ކުރިއަށް އޮތް ސައުވީސް ގަޑިއިރު ތެރޭގައި ރާއްޖޭގެ ބޮޑު ބަޔަކަށް މޫސުން ގޯސްވާނެކަމަށް މޫސުމާ ބެހޭ ޤައުމީ އިދާރާއިން ލަފާކޮށްފައިވާތީ، ބޯކޮށް ވާރޭވެހި ފެންބޮޑުވުމުގެ ނުރައްކަލުން ސަލާމަތްވުމަށް ދުރާލާ ފިޔަވަޅުތައް އެޅުމަށް އިލްތިމާސްކޮށްފިއެވެ.
ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީން ބުނީ، މި ފެން ބޮޑުވުމުގެ ސަބަބުން ލިބިދާނެ ގެއްލުންތައް ކުޑަކުރުމުގެ ގޮތުން، ގޭގެއަށް ފެން ނުވަންނާނެހެން ދޮރުމަތީގައި ވެލިބަސްތާ ޖެހުމާއި އޮޅިގަނޑު އުސްކުރުން ފަދަ ރައްކާތެރިކަމުގެ ފިޔަވަޅުތައް ދުރާލާ އެޅުމަށެވެ. އަދި ފެނުގެ އަސަރު ފޯރައި ހަލާކުވެދާނެ ފަދަ އަގުބޮޑެތި މުދަލާއި ގޭތެރޭގެ ސާމާނު، ފެން ނުފޯރާނެ ފަދަ ރައްކާތެރި އުސް ތަންތަނަށް ބަދަލުކުރުމަށް ވެސް އެންޑީއެމްއޭއިން ވަނީ އެދިފައެވެ.
މީގެ އިތުރުން، ވިއްސާރައިގެ ސަބަބުން އެއްވެސް ކަހަލަ ކުއްލި އެހީތެރިކަމަކަށް ބޭނުންވެއްޖެ ހިނދެއްގައި، ފަސްޖެހުމެއްނެތި 911އަށް ގުޅުއްވައިގެން ރިޕޯޓުކުރުމަށް ވެސް ކަމާ ބެހޭ އިދާރާއިން ވަނީ ނަސޭހަތްތެރިވެފައެވެ.
