ދިރުވާލައިގެން އެއް ކިލޯއަށް ވުރެ ގިނަ މަސްތުވާތަކެތި ވައިގެ މަގުން އެތެރެކުރަން އުޅުނު މީހަކު ހައްޔަރުކޮށްފިއެވެ.
ކަސްޓަމްސްއިން މިރޭ މީޑިއާތަކާ ހިއްސާކުރި މެސެޖުގައި ބުނީ އެ މީހާ އެެތެރެކުރަން އުޅުނީ ކޮކެއިން ކަމަށެވެ.
ވީއައިއޭއިން އެެތެރެވި އެ މީހާ ދިރުވާލައިގެން އެތެރެކުރަން އުޅުނު 66ބުލެޓްގައި 1180ގްރާމް ހުރި ކަމަށް ކަސްޓަމްސްއިން ބުންޏެވެ.
އެ ތަކެތީގެ މަަގުމަތީއަގު 2.9މިލިއަން ދިވެހި ރުފިޔާއަށް ވުރެ އިތުރު ވާނެ ކަމަށް ވެސް ކަސްޓަމްސްއިން ބުންޏެވެ.
އަތުލައިގަތް މީހާގެ ވަނަވަރު ކަސްޓަމްސްއިން ހާމައެއް ނުކުރެއެވެ.
މި ފަހަކަށް އައިސް މަސްތުވާތަކެތި އަތުލައިގަންނަ މިންވަރު ވަނީ ވަރަށް ބޮޑަށް އިތުރުވެފައެވެ.
