މަރްޙޫމް ޝައިޚް އިސްމާޢީލް މުޙައްމަދުގެ އެންމެ ބޮޑު އެއް ޢިލްމީ މަސައްކަތްޕުޅު ކަމުގައިވާ ކީރިތި ޤުރުއާނުގެ ދިވެހި ތަރުޖަމާ “އައްތަފްސީރުލް މުޔައްސަރު” ޗާޕުކޮށް ނެރުމުގެ އެންމެހާ ތައްޔާރީތައް ގާތްގަނޑަކަށް ނިމިފައިވާކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ހާމަކުރައްވައިފިއެވެ.
އިސްލާމްދީނުގެ ނޫރު ފެތުރުއްވުމަށް މުޅި ޙަޔާތްޕުޅު ހޭދަކުރެއްވި ޝައިޚް އިސްމާޢީލްގެ މި ތަރުޖަމާއަކީ ގިނަ ބަޔަކު އިންތިޒާރުކުރަމުންދާ ފޮތެއްކަން ފާހަގަކުރައްވައި، ދިވެހިންނަށް ދީނީ ތަޢުލީމު ފޯރުކޮށްދެއްވުމުގައި އެކަލޭގެފާނު ގެންގުޅުއްވި ޙިކުމަތްތެރި އަދި ދުރުވިސްނޭ ސިޔާސަތަކީ ނުހަނު ފުރިހަމަ ނަމޫނާއެއްކަމަށް ވަޒީރު ސިފަކުރެއްވިއެވެ.
ޑރ. ޝަހީމް ވިދާޅުވި ގޮތުގައި މަދީނާ ޔުނިވަރސިޓީން ތަޢުލީމު ޙާޞިލުކުރައްވައިގެން ރާއްޖެ ވަޑައިގެން، ޢަރަބި ބަހުން ކިޔަވައިދެއްވުމަށްޓަކައި ޝައިޚް ވަނީ “މަދަރުސާ ޠައިބާ”ގެ ނަމުގައި ޚާއްޞަ މަރުކަޒެއް ބިނާކުރައްވާފައެވެ. ނަމަވެސް، އޭރުގެ ސަރުކާރުން އެ މަދަރުސާ ބަންދުކޮށް ދީނީ މަސައްކަތްޕުޅަށް އެތައް ހުރަސްތަކެއް ކުރިމަތިކުރުވި ދަނޑިވަޅުގައި ވެސް، ޝައިޚްގެ ފުށުން ފެނިގެންދިޔައީ ކެތްތެރިކަމާއި މާތް އަޚުލާޤުކަމަށް ވަޒީރު ވިދާޅުވިއެވެ.
އެއްވެސް ފަރާތަކަށް ބަދުބަހެއް ވިދާޅުވުމުގެ ބަދަލުގައި، ޝައިޚް ދެން ފެއްޓެވީ ދަރިވަރުން ރާއްޖެއިން ބޭރަށް ފޮނުއްވައިގެން ތަޢުލީމު އުނގަންނަވައިދެއްވުމުގެ މަތިވެރި މަސައްކަތްޕުޅެވެ. އެގޮތުން ބޭރަށް ފޮނުއްވި ސަތޭކައަށްވުރެ ގިނަ ދަރިވަރުން މިއަދު ރާއްޖޭގެ ދީނީ އަދި ސިޔާސީ އެކިއެކި އިސް މަޤާމުތަކުގައި ޚިދުމަތްކުރައްވަމުން ގެންދަވާކަން ޑރ. ޝަހީމް ވަނީ ފާހަގަކުރައްވާފައެވެ.
މީހުންނާ މެދު އަބަދުވެސް ހެޔޮކޮށް ހިތްތެވުމާއި އޯގާތެރިކަން އިސްކުރެއްވި ޝައިޚް އިސްމާޢީލަކީ މުޅި މުޖުތަމަޢު ނަމޫނާއަކަށް ބަލަންޖެހޭ ފަދަ ޝަޚްޞިއްޔަތެއްކަން ފާހަގަކުރައްވައި، އެކަލޭގެފާނު އަވަހާރަވުމަކީ ދިވެހި އުންމަތަށް ލިބުނު ފޫނުބެއްދޭވަރުގެ ބޮޑު ގެއްލުމެއްގެ ގޮތުގައި ވަޒީރު ވަނީ ސިފަކުރައްވާފައެވެ.
