މިއަދު ލިބުނު ނަތީޖާއިން ހިތްވަރު ހޯދައިގެން 2028ވަނަ އަހަރުގެ ރިޔާސީ އިންތިޚާބަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާ އެކު ފިސާރި ސާބިތުކަމާ އެކު ތިބިކަން ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ އިޢުލާންކުރައްވައިފިއެވެ.
މިކަން ހާމަކުރައްވައި ޢަބްދުއްރަޙީމް ވަނީ މީސްމީޑިއާ މަންސަ ‘އެކްސް’ ގައި މިއަދު މެސެޖެއް އާންމުކުރައްވާފައެވެ. އެމަނިކުފާނު މިފަދައިން ވިދާޅުވެފައި ވަނީ، އިދިކޮޅު އެމްޑީޕީގެ ކެންޑިޑޭޓް އަބްދުﷲ ސޯދިގުއާ ވާދަކުރައްވައި، ކުޑަ ވޯޓުގެ ފަރަގަކުން ޕީއެންސީގެ ކެންޑިޑޭޓް އަޙްމަދު ސަޢީދަށް އިންތިޚާބު ނާކާމިޔާބުވެފައި ވަނިކޮށެވެ. ދެ ކެންޑިޑޭޓުންގެ ދެމެދުގައި ހުރީ އެންމެ 62 ވޯޓުގެ ތަފާތެކެވެ.
ޢަބްދުއްރަޙީމްގެ ބަޔާނުގައި، ސަޢީދަށް ތާއީދުކުރެއްވި އެންމެހާ ފަރާތްތަކަށް ޚާއްޞަ ޝުކުރެއް އަދާކުރައްވާފައިވެއެވެ. އަދި ޕީއެންސީގެ ކެމްޕޭން ޓީމުން ކޮށްފައިވާ ބުރަ މަސައްކަތްތަކަށް ތަޢުރީފުކުރައްވަމުން، ހިތަދޫގައި ބެހެއްޓުނު ވޯޓު ފޮށިތަކުން ސަޢީދު މެޖޯރިޓީ ހޯއްދެވުމަކީ ޕާޓީއަށް ލިބިގެންދިޔަ ވަރަށް ބޮޑު ކާމިޔާބީއެއްގެ ގޮތުގައި ސިފަކުރެއްވިއެވެ. ހިތަދޫގެ ފޮށިތަކުން 34 ވޯޓުގެ ތަފާތުން ސަޢީދު ކުރި ހޯއްދެވި ނަމަވެސް، އިންތިޚާބުގެ ނަތީޖާ އެނބުރިގެން ދިޔައީ މާލޭގައި ބެހެއްޓި ފޮށީގެ ނަތީޖާއިން އެމްޑީޕީއަށް ބޮޑުތަނުން ކުރި ލިބުމާ ގުޅިގެންނެވެ.
ތަފާސްހިސާބުތަކަށް ބަލާއިރު، އެމްޑީޕީގެ ކެންޑިޑޭޓަށް 51.15 އިންސައްތައާ އެކު 1375 ވޯޓު ލިބިވަޑައިގަތްއިރު، ސަޢީދަށް ލިބިވަޑައިގަތީ 48.85 އިންސައްތައާ އެކު 1313 ވޯޓެވެ. ޢަބްދުއްރަޙީމް ވިދާޅުވީ، މާތްﷲގެ އިރާދަފުޅާ އެކު، އިންތިޚާބުން ފެނިގެންދިޔަ މަންޒަރުން އައު ހިތްވަރެއް ލިބި، ކުރިއަށް އޮތް ބޮޑު އިންތިޚާބަށް ސަރުކާރު އޮތީ ފުރިހަމައަށް އަމާޒު ހިފާފައި ކަމަށެވެ.
މި އިންތިޚާބުގެ ކެމްޕޭންގައި ޕީއެންސީގެ އިސް ސަފުން ގިނަގުނަ މަސައްކަތްތަކެއް އައްޑޫގައި ކޮށްފައިވެއެވެ. އިންތިޚާބުގެ ކެމްޕޭން މެނޭޖަރުގެ ގޮތުގައި ހަރަކާތްތެރިވެވަޑައިގަތް ވަޒީރު ޢަބްދުﷲ ރާފިޢު ވެސް ވަނީ، މި ނަތީޖާއަކީ މުސްތަޤުބަލަށް އެޅުނު ރަނގަޅު ބިންގަލެއްކަމަށް ވިދާޅުވެ، އައު ފެށުމަކުން ޕާޓީގެ ހަރަކާތްތައް އިތުރު ހަރުފަތަކަށް ގެންދަވާނެކަން ނޫސްވެރިންނަށް ކަށަވަރުކޮށްދެއްވާފައެވެ.
