ރައްޔިތުންގެ މަޖިލީހުގެ މިއަހަރުގެ ފަހު ދައުރުގެ މަސައްކަތްތައް، ކުށްކޮށްގެން ހޯދާ މުދަލާގުޅޭ ބިލު ފަދަ މުހިންމު މައްސަލަތަކަކާ އެކު އަންނަ ހޯމަ ދުވަހު މަޖިލިސް ފެށުމަށް ނިންމައިފިއެވެ.
މި މަހުގެ 5ވަނަ ދުވަހަށް ތާވަލުކޮށްފައިވާ ފުރަތަމަ ޖަލްސާގެ އެޖެންޑާގައިވާ ގޮތުން، ސަރުކާރުން ހުށަހަޅާފައިވާ ކުށްކޮށްގެން ހޯދާ މުދަލާގުޅޭ ބިލުގެ އިބްތިދާޢީ ބަހުސް ކުރިއަށް ގެންދާނެއެވެ. އޭގެ އިތުރުން، ރިޔާސަތުން ހުށަހަޅާ ދެ މައްސަލައެއް ވެސް އެޖެންޑާކޮށްފައިވެއެވެ. އެއީ މީރާގެ ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް ބޭފުޅަކު އައްޔަންކުރެއްވުމަށް ރައީސުލްޖުމްހޫރިއްޔާ ފޮނުއްވާފައިވާ ނަންފުޅު ދިރާސާކުރުމާއި، އޯއައިސީގެ އެންޓި-ކޮރަޕްޝަން މުއާހަދާ ކަމަށްވާ “މައްކަތުލް މުކައްރަމާ ކޮންވެންޝަން”ގައި ރާއްޖެއިން ބައިވެރިވުމަށް ރުހުން ހޯދުމަށް ފޮނުއްވާފައިވާ މައްސަލައެވެ.
ޤާނޫނުހަދާ މަޖިލީހުގެ ޤަވާއިދު ބަޔާންކުރާ ގޮތުން، ކޮންމެ މީލާދީ އަހަރެއްގެ ޖަލްސާތައް ތިން ބަޔަކަށް ބަހާލައިގެން ކުރިއަށް ގެންދަންޖެހެއެވެ. އެގޮތުން ފަހު ދައުރު ނުވަތަ ތިންވަނަ ދައުރު އޮކްޓޫބަރު މަހުގެ ފުރަތަމަ ހަފުތާގެ ތެރޭގައި ފެށުމަށް ލާޒިމުކުރެއެވެ. އަދި މި ދައުރުގެ ޖަލްސާތައް ނޮވެންބަރު މަހުގެ ނިޔަލަށް ދެމިގެންދާނެއެވެ. ޤަވާއިދުގައިވާ ގޮތުން ފުރަތަމަ ދައުރު ފެބްރުއަރީ 1އިން މޭ 15އަށް ކުރިއަށްދާއިރު، ދެވަނަ ދައުރު އޮންނާނީ ޖޫން 1އިން އޮގަސްޓް 15އަށެވެ.
އެހެންނަމަވެސް، މަޖިލީހުގައި މުހިންމު މަސައްކަތްތަކެއް ނުނިމި ހުރިނަމަ، މެންބަރުންގެ އަޣުލަބިއްޔަތުން ވޯޓުދީގެން ދައުރުގެ މުއްދަތު ދަންމާލުމުގެ އިޚުތިޔާރު ލިބިގެންވެއެވެ. ނިމިދިޔަ ދެ ދައުރުގެ މުއްދަތު ވެސް ވަނީ މިގޮތުގެ މަތިން އިތުރުކޮށްފައެވެ. ފުރަތަމަ ދައުރުގައި ގިނަ މަސައްކަތްތަކެއް ހުރުމުގެ ސަބަބުން، މެންބަރުން ޗުއްޓީއަށް ވަޑައިނުގެން، ވިދިވިދިގެން ދެވަނަ ދައުރުގެ ޖަލްސާތައް ވަނީ ފަށާފައެވެ. އެންމެ ފަހުން މެންބަރުން ޗުއްޓީއަށް ވަޑައިގެންފައި ވަނީ އޮގަސްޓް މަހުގެ 26ވަނަ ދުވަހު ދެވަނަ ދައުރުގެ މަސައްކަތްތައް އެއްކޮށް ނިންމާލުމަށް ފަހުގައެވެ.
