މާލޭގެ ރަސްމީ ފާލަން ކައިރިން ކަނޑުމަތީގައި ބުރާސްފަތި ދުވަހުގެ ރޭ ލޯންޗަކާއި ދޯންޏެއް މުޑިއަރައި ހިނގި އެކްސިޑެންޓުގައި އަނިޔާވި ތިން މީހަކަށް އަދިވެސް އައިޖީއެމްއެޗްގައި ފަރުވާދެމުން އަންނަކަން އެ ހޮސްޕިޓަލުން ބުނެފިއެވެ.
މި ހާދިސާއާ ގުޅިގެން އަނިޔާވެގެން ހޮސްޕިޓަލަށް ގެންދިޔައީ ދިވެހި ފިރިހެނަކާއި ހަތަރު ބިދޭސީންނެވެ. އައިޖީއެމްއެޗުން މައުލޫމާތު ދިން ގޮތުގައި، މީގެ ތެރެއިން ދެ މީހަކަށް އެމެޖެންސީގައި ފަރުވާ ދިނުމަށްފަހު މިހާރު ވަނީ ދޫކޮށްލާފައެވެ. ނަމަވެސް ބާކީ ތިބި ތިން މީހުންނަށް ވޯޑުގައި އެޑްމިޓްކޮށްގެން އަންނަނީ އިތުރު ފަރުވާދެމުންނެވެ. އެހެންނަމަވެސް، މިހާރު ހޮސްޕިޓަލުގައި ފަރުވާ ހޯދަމުންދަނީ އެއިން ކޮން ގައުމުތަކެއްގެ ބައެއްކަން އެ އިދާރާއިން ސާފުކޮށްދީފައެއް ނުވެއެވެ.
ފުލުހުންގެ މެރިން ޕޮލިހުން މައުލޫމާތު ދޭ ގޮތުގައި މި އެކްސިޑެންޓް ހިނގާފައި ވަނީ ބުރާސްފަތި ދުވަހުގެ ރޭގަނޑު 9:10ހާއިރުއެވެ. މި ހާދިސާ ހިނގުމާ އެކު، ލޯންޗުގައި ޖެހުނު ދޯނި ވަނީ އެ ސަރަހައްދުގައި މަޑުނުކޮށް ފިލާފައެވެ. އެހެންކަމުން، ސަލާމަތީ ބާރުތަކުން މިހާރު ދަނީ އެ އުޅަނދު ހޯދުމުގެ މަސައްކަތް ހުއްޓުމެއްނެތި ކުރަމުންނެވެ. އަދި އާންމުންގެ އެހީއަށް ވެސް ފުލުހުން ވަނީ އެދިފައެވެ.
