މި މަހުގެ ކުރީކޮޅު ބޭއްވި ލޯކަލް ކައުންސިލް އިންތިޚާބުގައި ވެރިކަންކުރާ ޕީއެންސީއަށް ކުރިމަތިވި ބޮޑު ނާކާމިޔާބީއާ ގުޅިގެން، ރައީސުލްޖުމްހޫރިއްޔާގެ ކެބިނެޓުގައި ހިމެނިވަޑައިގަންނަވާ މުހިންމު ތިން ވަޒީރަކު، އޭގެ ތެރޭގައި ލޯކަލް ގަވަނަންސް މިނިސްޓަރު އާދަމް ޝަރީފް އުމަރާއި ސޯޝަލް އެންޑް ފެމިލީ މިނިސްޓަރު ޑރ. އައިޝަތު ޝިހާމް ހިމެނޭހެން، މަގާމުން ވަކިކުރައްވައިފިއެވެ.
އިތުބާރު ހުރި މަސްދަރުތަކުން ކަށަވަރުކޮށްދޭ ގޮތުގައި، މި ދެ ބޭފުޅުންގެ އިތުރުން ޚާރިޖީ ވަޒީރު ޑރ. އަބްދުﷲ ޚަލީލް ވެސް ވަނީ ވަޒީރުކަމުގެ މަގާމުން ދުރުކޮށްފައެވެ. ސަރުކާރުގެ އެންމެ އިސް ސަފަށް މި ބަދަލުތައް ގެނެސްފައިމިވަނީ، މި މަހުގެ ހަތަރުވަނަ ދުވަހު އޮތް ބައި-އިލެކްޝަންތަކުގައި އިދިކޮޅު އެމްޑީޕީން ގިނަ ގޮނޑިތަކެއް ކާމިޔާބުކޮށް، ސަރުކާރަށް އޮތް ތާއީދު ކުޑަވެފައިވާކަން ހާމަވެފައިވާ ދަނޑިވަޅެއްގައެވެ.
ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިޚާބުގެ އިތުރުން، ރިޔާސީ އަދި މަޖިލިސް އިންތިޚާބު އެއްކޮށް ބޭއްވުމާ މެދު ރައްޔިތުންގެ ޚިޔާލު ހޯދުމަށް ނެގި ވޯޓުގައި ވެސް ސަރުކާރަށް ވަނީ ނާކާމިޔާބީއާ ކުރިމަތިލާން ޖެހިފައެވެ. އެ ވޯޓުގައި ގިނަ ރައްޔިތުން ގޮތް ނިންމާފައިވަނީ ސަރުކާރުން ހުށަހެޅި ގޮތާ މުޅިން ޚިލާފަށެވެ.
ކެބިނެޓަށް ގެނައި މި ކުއްލި ބަދަލުތަކުގެ ކުރިން، ސަރުކާރު ހިއްސާވާ ބައެއް ކުންފުނިތަކުގެ އިސްވެރިންނަށް ވެސް ވަނީ ފިޔަވަޅު އަޅާފައެވެ. އެގޮތުން، މި މަހުގެ ހަވަނަ ދުވަހު އެގްރޯ ނެޝަނަލް ކޯޕަރޭޝަންގެ މެނޭޖިން ޑިރެކްޓަރު ހުސައިން ދީދީގެ އިތުރުން ފެނަކަ ކޯޕަރޭޝަންގެ މެނޭޖިން ޑިރެކްޓަރު މުޙައްމަދު ނަޖާޙް ވެސް ވަނީ އެ ބޭފުޅުން ތިއްބެވި މަގާމުތަކުން ވަކިކޮށްފައެވެ.
