އިދިކޮޅު އެމްޑީޕީން ބާއްވަން ރާވައިފައިވާ މުޒާހަރާ މި މަހުގެ 13އަށް ފަސްކޮށްފިއެވެ.
ތަކެތީގެ އަގު އިންތިހާއަށް އުފުލެމުންދާތީއާއި ޑޮލަރުގެ އަގު ވެސް އިންތިހާއަށް އުފުލެމުންދާކަމަށް ބުނެ އެމްޑީޕީން މި މަހުގެ 12ވަނަ ދުވަހު ބޮޑު މުޒާހަރާއެއް ބާއްވަން ނިންމިކަން ކުރިން އޮތީ އިއުލާންކޮށްފައެވެ.
ނަމަވެސް އެމްޑީޕީން މިއަދު ބުނީ އެ މުޒާހަރާ މި މަހުގެ 13އަށް މިހާރު ފަސްކޮށްފައިވާ ކަމަށެވެ.
އެ މުޒާހަރާ ފަސްކުރި ސަބަބެއް އެމްޑީޕީން ހާމައެއް ނުކުރެއެވެ.
“ދަތިވެއްޖެ” ނަމުގައި މި މަހުގެ 13ވަނަ ދުވަހުގެރޭ 8:30ގައި ސޯޝަލް ސެންޓަރު ކުރިމަތިން ފަށާ އެ މުޒާހަރާގައި ވީހާ ވެސް ގިނަ ރައްޔިތުން ބައިވެރިވުމަށް ވެސް އެ ޕާޓީން ވަނީ އިލްތިމާސްކޮށްފައެވެ.
އެމްޑީޕީން ބޮޑު މުޒާހަރާއެއް ބޭއްވުމަށް ތައްޔާރުވަމުންދާ އިރު ފަހަކަށް އައިސް އެ ޕާޓީގެ ހަރަކާތްތައް އޮތީ ވަރަށް ބޮޑަށް މަޑުޖެހިފައެވެ.
