ވަޠަނީ ޚިދުމަތުގެ ނަތީޖާ ރައްޔިތުން ބަލައިގަނެ، ކަނޑައެޅި އަމާޒަށްވުރެ ބޮޑު ކާމިޔާބީއެއް ހާސިލުކުރެވިއްޖެކަމަށް ދިފާޢީ، ވަޠަނީ ޚިދުމަތާ ބެހޭ ވަޒީރު ޙަސަން ރަޝީދު ވިދާޅުވެއްޖެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްނެންގެވުމުގެ މަތިން މިދިޔަ އަހަރުގެ އޮކްޓޯބަރު މަހުގެ ފުރަތަމަ ދުވަހު ފެށި ވަޠަނީ ޚިދުމަތުގެ މި ޕްރޮގްރާމަށް މިދިޔަ ބުރާސްފަތި ދުވަހު ވަނީ އެއް އަހަރު ފުރިފައެވެ.
ވަޠަނީ ޚިދުމަތުގެ ޕްރޮގްރާމްގެ ދެވަނަ ބެޗްގެ ދަސްވެނިވުމުގެ ރަސްމިއްޔާތުގައި ވާހަކަފުޅު ދައްކަވަމުން ވަޒީރު ފާހަގަކުރެއްވި ގޮތުގައި، ފުރަތަމަ އަހަރުގެ ތެރޭގައި އެއްހާސް ޒުވާނުން ތަމްރީނުކުރުމަށް ރައީސް ކަނޑައެޅުއްވި ލަނޑުދަނޑި ވަނީ މުގުރާލެވިފައެވެ. އެގޮތުން، ވޭތުވެދިޔަ ބާރަ މަސްދުވަހުގެ ތެރޭގައި ޖުމްލަ 1028 ކުދިން ވަނީ މި ޕްރޮގްރާމް ފުރިހަމަކޮށްފައެވެ.
ގޯސް މަގުތައް ޚިޔާރުކުރުމަށް ޒުވާނުންނަށް ބާރުއަޅާ އެތައް ކަމެއް މުޖުތަމަޢުގައި އޮތްކަމަށް އިޝާރާތްކުރައްވަމުން، ވަޒީރު ވިދާޅުވީ، ސަރުކާރުގެ މި އަމާޒަކީ އެފަދަ ނުރައްކާތަކުން ދިވެހި ޒުވާނުން ސަލާމަތްކުރުން ކަމަށެވެ. އަދި މިއީ މުޅި ދިވެހި މުޖުތަމަޢު ނުހަނު ބޮޑަށް ބަލައިގަންނަ، އޭގެ ހެޔޮ ނަތީޖާ ފެންނަމުންދާ މުހިންމު މަސައްކަތެއްކަން އެމަނިކުފާނު ވަނީ ތަކުރާރުކުރައްވާފައެވެ.
މީގެ އިތުރުން، މި ތަމްރީނުތަކުން ހާސިލުކުރި އިލްމާއި ހުނަރު އަމަލީ ދިރިއުޅުމުގައި ބޭނުންކުރުމުގެ މުހިންމުކަމުގެ މައްޗަށް ވަޒީރު ވަނީ އަލިއަޅުއްވާލައްވާފައެވެ. ދަސްވެނިވި ޒުވާނުންނަށް ނަސޭހަތްތެރިވަމުން އެމަނިކުފާނު އެދިވަޑައިގަތީ، ދިރިއުޅުމުގައި ދިމާވާ ކޮންމެ ގޮންޖެހުމަކާ ވެސް ކެރިގެން ކުރިމަތިލުމަށާއި، ކޮންމެ ފަދަ ހާލަތެއްގައި ވެސް ކެތްތެރިކަން އިސްކޮށް، ގަދައަޅައި މަސައްކަތްކުރުމަށެވެ. ކާމިޔާބީގެ ސިއްރަކީ ހިތްވަރާ އެކު މަސައްކަތްކުރުންކަން ވެސް ވަޒީރު ޙަސަން ރަޝީދު ވަނީ ފާހަގަކުރައްވާފައެވެ.
