އިސްލާމީ ކަންތައްތަކާއި އައުޤާފާ ބެހޭ ވުޒާރާއިން މާލެއާއި އަތޮޅުތެރޭގައި ކުރިއަށްގެންދާ ޒުވާން ޚަޠީބުން ތަމްރީނުކުރުމުގެ ފަސްވަނަ ފިޔަވަހީގެ އޮޑިޝަންތައް ފަށައިފިއެވެ.
މި ޕްރޮގްރާމުގެ ދަށުން މި ފަހަރު އަލަށް 80 ކުދިންނަށް ފުރުޞަތު ދިނުމަށް ކަނޑައަޅާފައިވާއިރު، އޭގެ ތެރޭގައި ހިމެނެނީ މާލެ ސަރަޙައްދުން ހޮވާ ސާޅީސް ކުދިންނާއި ރަށްރަށުން ހޮވާ ސާޅީސް ކުދިންނެވެ. މާލެ ސަރަޙައްދުގެ އޮޑިޝަންތައް މި މަހުގެ ބާރައިން ވިއްސަށް ކުރިއަށްދާއިރު، އަތޮޅުތެރޭގެ އޮޑިޝަންތައް ބޭއްވުމަށް ތާވަލުކޮށްފައި ވަނީ މި މަހުގެ 15އިން 20 އެވެ. އެ ވުޒާރާއިން މަޢުލޫމާތު ދެއްވާ ގޮތުގައި މާލޭގައި ފެށި އޮޑިޝަންތަކުގައި އިއްޔެ އެކަނި ވެސް 22 ކުދިން ވަނީ ބައިވެރިވެފައެވެ.
އޮޑިޝަނުން ފާސްވާ ދަރިވަރުންގެ ތަމްރީނުތައް މި މަހުގެ 23އިން 30އަށް ކުރިއަށް ގެންދިއުމަށް ރާވާފައިވާއިރު، އަތޮޅުތެރެއިން ހޮވޭ ކުދިންގެ ކިލާސްތައް ނަގައިދޭނީ އޮންލައިންކޮށެވެ. މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާއްޞަ އިސްނެންގެވުމަކަށް، ގްރޭޑް 10، 11 އަދި 12ގައި ތަޢުލީމު ހާސިލުކުރަމުންދާ ދަރިވަރުންނާއި، ސްކޫލް ނިންމާފައިވާ އުމުރުން 18 އަހަރު ނުފުރޭ ޒުވާނުންނަށް އަމާޒުކޮށްގެން ހިންގާ މުހިންމު މަޝްރޫޢެކެވެ.
މިހާތަނަށް މި ޕްރޮގްރާމުގެ ކާމިޔާބު 4ބުރެއް ނިންމާލާފައިވާއިރު، ހަސަތޭކައަށްވުރެ ގިނަ ކުދިން ވަނީ ޚަޠީބުކަމުގެ ސަނަދު ހާސިލުކޮށް މިންބަރުތަކަށް އަރަން ފަށާފައެވެ. ސަރުކާރުގެ އެންމެ ބޮޑު އެއް އަމާޒަކީ މި ޕްރޮގްރާމުގެ ތެރެއިން އެއްހާސް ޒުވާން ޚަޠީބުން އުފައްދައި، އިސްލާމީ ރިވެތި އުސޫލުތަކަށް ލޯބިކުރާ ޖީލެއް ބިނާކުރުމެވެ.
