އެކުވެރި ދައުލަތްތަކުގެ އާންމު މަޖިލީހުގެ 81ވަނަ ސެޝަންގެ ހަވާސާގައި، ބައިނަލްއަޤުވާމީ މައިދާނުގައި ރާއްޖޭގެ އަޑު އުފުލުމަށް ކުރާ މަސައްކަތްތަކުގެ އަގުވަޒަންކުރެއްވުމުގެ ގޮތުން ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް އެމެރިކާގެ ނިއުޔޯކުގައި ހުންނަ ދިވެހިރާއްޖޭގެ ދާއިމީ މިޝަނަށް ވަޑައިގެންފިއެވެ.
މި ޒިޔާރަތުގައި އެ މަނިކުފާނަށް މަރުޙަބާ ދެންނެވީ އދ.އަށް ރާއްޖެއިން ކަނޑައަޅުއްވާފައި ހުންނަވާ ދާއިމީ މަންދޫބު ޑރ. ޢަލީ ނަސީރު މުޙައްމަދެވެ. މިޝަންގެ އިސްވެރިންނާއެކު ބޭއްވެވި ބައްދަލުވުމެއްގައި، ދިވެހި ސަރުކާރުގެ ސިޔާސަތުތައް ދުނިޔެއަށް ހާމަކޮށްދިނުމުގައި އެ އޮފީހުން އަދާކުރަމުންދާ މުހިންމު ދައުރު ފާހަގަކުރައްވައި، ނައިބު ރައީސް ވަނީ ޝުކުރު އަދާކުރައްވާފައެވެ. އަދި އޮފީހުގެ އިދާރީ ކަންކަން ހިނގަމުންދާ ގޮތް ވެސް އެ މަނިކުފާނު އޮޅުންފިލުއްވިއެވެ.
މީގެ އިތުރުން، މި ޚާއްޞަ ޒިޔާރަތުގެ ހަނދާން އާކުރެއްވުމުގެ ގޮތުން އެ މަނިކުފާނު ވަނީ މިޝަންގެ މެހެމާނުންގެ ފޮތުގައި ސޮއިކުރައްވާފައެވެ. މި ބައްދަލުވުންތަކުގައި ނައިބު ރައީސްގެ އަރިހުގައި ޚާރިޖީ ވަޒީރު އިރުތިޝާމް އާދަމް އާއި ތަޢުލީމީ ވަޒީރު ޑރ. އިސްމާޢިލް ޝަފީޢު ބައިވެރިވެވަޑައިގެންނެވިއެވެ.
އެކުވެރި ދައުލަތްތަކުގެ ޢާންމު މަޖިލީހުގެ 81ވަނަ ސެޝަންގެ އެންމެ އިސްވެރިންގެ ބައްދަލުވުންތަކުގައި ބައިވެރިވެވަޑައިގަތުމަށްޓަކައި، ރައީސުލްޖުމްހޫރިއްޔާގެ ނައިބު ނިއުޔޯކަށް ވަޑައިގަތީ މި ހިނގާ މަހުގެ 20ވަނަ ދުވަހުއެވެ.
