ރާއްޖޭގެ އެކި ބަނދަރުތައް ބޭނުންކުރުމުގައި މަސްވެރިންނަށް ކުރިމަތިވަމުންދާ އުނދަގޫތަކަށް ލުއިފަސޭހަ ގޮތްތަކެއް ހޯދައިދިނުމުގެ މަގުސަދުގައި ކަމާގުޅޭ އިސް ފަރާތްތަކުން ފުޅާ ދާއިރާއެއްގައި މަޝްވަރާކުރައްވައިފިއެވެ.
މި މުހިންމު މަޝްވަރާތަކުގައި ސަރުކާރުގެ ފަރާތުން އިސްކޮށް ހުންނެވީ މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމެވެ. މޯލްޑިވްސް ޕޯޓްސް ލިމިޓެޑް (އެމްޕީއެލް) ތަމްސީލުކުރެއްވީ އެ ކުންފުނީގެ ސީއީއޯ ކެޕްޓަން ޙުސައިން ޝަފީޤެވެ. ދެ މުއައްސަސާ ގުޅިގެން ކުރިއަށްގެންދިޔަ މި ބައްދަލުވުމުގައި ވަނީ ބަނދަރުތަކުގެ ޚިދުމަތް ހޯދުމުގައި އޮޑިވެރިންނާއި ކެޔޮޅުންނަށް ހުރި ދަތިތަކަށް ޢަމަލީ ހައްލުތަކެއް ގެނައުމާ ގުޅޭގޮތުން ވާހަކަދެކެވިފައެވެ.
ވަޒީރު އަޙްމަދު ޝިޔާމް، އެމް.ޕީ.އެލްގެ ސީ.އީ.އޯ ކެޕްޓަން ޙުސައިން ޝަފީޤާ ބައްދަލުކުރެއްވުން.
މި ބައްދަލުވުމުގައި، ބަނދަރުތައް ބޭނުންކުރުމުގައި މަސްވެރިންނަށް ދިމާވާ ދަތިތަކާ ގުޅޭގޮތުން ފުޅާ ދާއިރާއެއްގައި މަޝްވަރާކުރެވުނެވެ. އަދި އެމް.ޕީ.އެލްގެ ފަރާތުން ވެދެވެން އޮތް ހުރިހާ… pic.twitter.com/ULFWNppKqA
— Min of Fisheries, Agriculture and Ocean Resources (@MFAORmv) June 16, 2026
މި ބައްދަލުވުމުގައި ވާހަކަފުޅު ދައްކަވަމުން، މަސްވެރިންނަށް ފަސޭހަ އިންތިޒާމުތަކެއް ހަމަޖައްސައިދިނުމަށްޓަކައި އެމްޕީއެލްގެ ފަރާތުން ފޯރުކޮށްދެވެންހުރި ފުރިހަމަ އެއްބާރުލުމާއި އެހީތެރިކަން ދެއްވާނެކަމުގެ ޔަގީންކަން ކެޕްޓަން ޝަފީޤު ވަނީ ވަޒީރަށް އަރުވާފައެވެ. އޭގެ އިތުރުން، ދެކުނުގެ މަސްވެރިކަން ކުރިއެރުވުމަށް އައްޑޫ ސިޓީގައި ތަރައްޤީކުރުމަށް ހަމަޖެހިފައިވާ ‘ފިޝަރީޒް އެންޑް މެރިޓައިމް ހަބް’ މަޝްރޫޢާ ގުޅޭގޮތުން ވެސް ދެބޭފުޅުން ވަނީ ޚިޔާލު ބަދަލުކުރައްވާފައެވެ.
ދިވެހިރާއްޖޭގެ އިޤްތިޞާދުގެ މައިގަނޑު އެއް ތަނބު ކަމުގައިވާ މަސްވެރިކަމުގެ ސިނާޢަތު ކުރިއަރުވައި، އެ ދާއިރާގައި ހަރަކާތްތެރިވާ ފަރާތްތަކަށް އެކަށީގެންވާ ލުއިފަސޭހަތަކެއް ހޯދައިދިނުމަކީ ސަރުކާރުން ވަރަށް ބޮޑު އިސްކަމެއް ދީގެން މިހާރުވެސް ކުރިއަށްގެންދާ މަސައްކަތެކެވެ.
