ދ. ކުޑަހުވަދުއަށް ނިސްބަތްވާ 18 އަހަރުގެ ފިރިހެނަކު ފުލުހުންގެ ބެލުމުގެ ދަށުގައި ހުއްޓައި ފިލި މައްސަލައަކާ ގުޅިގެން، ކްރިމިނަލް ކޯޓުން އޭނާ ޝަރީއަތް ނިމެންދެން ބަންދުގައި ބެހެއްޓުމަށް އިއްޔެ އަމުރުކޮށްފިއެވެ.
ކްރިމިނަލް ކޯޓުގެ އިސް ގާޒީ އާދަމް މުހައްމަދު ނެރުއްވި މި އަމުރުގައި ބަޔާންކޮށްފައިވާ ގޮތުން، ކޯޓު އަމުރެއްގެ ދަށުން ހައްޔަރުކޮށްފައި ވަނިކޮށް އެ ޒުވާނާ ވަނީ ފުލުހުންގެ މަރުކަޒުން ނުކުމެގެން ގޮސްފައެވެ. އޭނާ ބަންދުކުރުމަށް ނިންމީ، ގާނޫނު ތަންފީޒުކުރާ އިދާރާއެއްގެ މަސައްކަތަށް ގަސްދުގައި ހުރަސްއަޅައި، ފުލުހުންގެ އަމުރުތަކަށް ތަކުރާރުކޮށް ނުކިޔަމަންތެރިވެފައިވާކަން ފުލުހުންގެ ތަހުގީގަށް ސާބިތުކޮށްދިނުމަށް އެކަށީގެންވާ ހެކި ހުށަހަޅާފައިވުމުންނެވެ.
މައްސަލައިގެ ތަހުގީގު ފުރިހަމަވަންދެން، މި ޒުވާނާ ކަސްޓޯޑިއަލް ޖަލެއްގައި ބެހެއްޓުމުގެ އިޚުތިޔާރު ގާނޫނީ ގޮތުން ލިބިގެންވާކަމަށް އިންވެސްޓިގޭޝަން އޮފިސަރު ކޯޓުގައި ވިދާޅުވެފައިވެއެވެ. ކޯޓު އަމުރުގައި އިތުރަށް ފާހަގަކޮށްފައިވާ ގޮތުގައި، ބަންދުން ވީއްލިގެން ނުދިއުމަށާއި އެއީ ގާނޫނީ ކުށެއްކަން ފުލުހުން ސީދާ އޭނާއަށް އަންގާފައި ވަނިކޮށް، އެ އެންގުމާ ޚިލާފަށް އޭނާ ވަނީ އެތަނުން ފިލާފައެވެ.
އޭނާ ފިލުމުގެ ކުރިން މަރުކަޒުގެ އެތެރޭގައި އިތުރު ބަޔަކާ އެކު ހަރަކާތްތެރިވިކަމަށް ބެލެވޭ ކަންތައްތަކެއް ހުރިކަން ވެސް ފުލުހުންގެ ފަރާތުން ކޯޓަށް މައުލޫމާތު ދީފައިވެއެވެ. ދައުލަތުގެ މުއައްސަސާތަކާއި ގާނޫނު ތަންފީޒުކުރާ މުވައްޒަފުންގެ މަސައްކަތަށް ގަސްދުގައި ހުރަސްއެޅުމަކީ ނުހަނު ސީރިއަސް މައްސަލައެއްކަމަށް ޝަރީއަތުން ވަނީ ކަނޑައަޅާފައެވެ.
