109 އަހަރުގެ ޖަލު ހުކުމެއް ތަންފީޒުކުރަމުންދާ މއ. ހަނީސަކްލް-1، ހުސައިން ޝިފާއު، ޖަލުގައި ދެވެން ނެތް ސިއްހީ ފަރުވާއެއް ހޯދުމަށްޓަކައި އެއް މަސްދުވަހުގެ މުއްދަތަށް ގޭބަންދަށް ބަދަލުކޮށްފައިވާކަން ދާޚިލީ ވަޒީރު ޢަލީ އިޙްސާން މިއަދު ހާމަކުރައްވައިފިއެވެ.
ޝިފާއުއަށް ޖަލު ޙުކުމް އިއްވުނީ ބޭރުގެ ކުންފުނިތަކަކަށް ސައްޙަނޫން ޓީޓީ ފޮނުވައިގެން މަކަރާއި ހީލަތް ހެދި މައްސަލަ އޭނާގެ މައްޗަށް ސާބިތުވުމުންނެވެ.
ނޫސްވެރިންނަށް މައުލޫމާތު ދެއްވަމުން ވަޒީރު ވިދާޅުވީ، ގައިދީންނަށް ޖަލުގައި އެކަށީގެންވާ ސިއްހީ ފަރުވާ ފޯރުކޮށްދެވެން ނެތް ހާލަތްތަކުގައި ހޮސްޕިޓަލަށް ނުވަތަ ގެއަށް ބަދަލުކުރުމަކީ ކަނޑައެޅިފައިވާ އުސޫލުތަކުގެ ތެރެއިން ކުރަމުން އަންނަ ކަމެއް ކަމަށެވެ. އެގޮތުން ޝިފާއު ގެއަށް ބަދަލުކުރަން ޖެހުނީ ވެސް، އޭނާއަށް ބޭނުންވާ ފަރުވާ ކަރެކްޝަންސްގެ ބެލުމުގެ ދަށުގައި ޖަލުގައި ބަހައްޓައިގެން ދެވެން ނެތުމުންކަމަށް އިޙްސާން ފާހަގަކުރެއްވިއެވެ.
ދިގު މުއްދަތެއްގެ ހުކުމެއް ތަންފީޒުކުރަމުންދާ ކުށްވެރިޔަކަށްވުމާ އެކު، އޭނާ މުޖުތަމައުގެ ތެރޭގައި ހުންނަ ވަގުތުތަކުގައި ފުރިހަމައަށް މޮނިޓާކުރަމުން ގެންދާނެކަމުގެ ޔަގީންކަން ސަރުކާރުން ވަނީ ދީފައެވެ. ވަޒީރު ވިދާޅުވި ގޮތުގައި އޭނާގެ ފަރާތުން އާންމުންނަށް އެއްވެސް ނުރައްކަލެއް ކުރިމަތިނުވާނެ ގޮތަށް ކަންކަން އިންތިޒާމުކޮށްފައިވާއިރު، ގޭބަންދުގެ ޝަރުތުތަކާ ޚިލާފުވެއްޖެނަމަ ވަގުތުން އަނބުރާ ޖަލަށް ގެންދާނެއެވެ. ޝިފާއުގެ މައްޗަށް ދައުލަތުން އުފުލި 23 ދައުވާއެއް ސާބިތުވެ، އޭނާ ދިގު މުއްދަތަކަށް ޖަލަށް ލުމަށް ހުކުމްކޮށްފައިވަނީ ވަގު ލިޔެކިޔުންތަކެއް ބޭނުންކޮށްގެން ބޮޑެތި އޮޅުވާލުންތަކެއް އޮޅުވާލާފައިވާކަން ޝަރީއަތަށް ކަށަވަރުވުމުންނެވެ.
