ރާއްޖެ އެތެރެކުރަން އުޅުނު 11 ކިލޯއަށް ވުރެ ގިނަ މަސްތުވާތަކެތި އަތުލައިގެންފިއެވެ.
ކަސްޓަމްސްއިން މިރޭ އާންމުކުރި މައުލޫމާތުގައި ބުނީ އެ މަސްތުތާތަކެތި އަތުލައިގަތީ މި މަހުގެ ހަތްވަނަ ދުވަހު ވެލާނާ އިންޓަނޭޝަނަލް އެއާޕޯޓުން ކަމަށެވެ.
އެގޮތުން ކަރިއާ މެދުވެރިކޮށް ގެނެސްފައިވާ ދެ ޕެކޭޖެއް ބެލިއިރު ޝައްކުވެގެން އިތުރަށް ބަލައި ފާސްކުރި އިރު އޭގައި މަސްތުވާތަކެތި ހުރި ކަމަށް ކަސްޓަމްސްއިން ބުންޏެވެ.
އޭގައި ހުރީ ކެނެބިސް ކަމަށާއި އޭގެ ބަރުދަން 11.75 ކިލޯއަށް އަރާ ކަމަށް ވެސް ކަސްޓަމްސްއިން ބުންޏެވެ.
އެ ކޮން ބަޔަކު އެތެރެކުރި އެއްޗެއް ކަމެއް ކަސްޓަމްސްއިން ނުބުނެއެވެ. އަދި އެ މައްސަލައިގައި މީހަކު ހައްޔަރުކުރި ކަމެއް ވެސް ނުބުނެއެވެ.
މިއީ މި ފަހުން އަތުލައިގަތް މަސްތުވާތަކެތީގެ އެންމެ ބޮޑު އަދަދެވެ.
ފަހަކަށް އައިސް ރާއްޖެ އެތެރެކުރަން އުޅެނިކޮށް އަތުލައިގަންނަ މަސްތުވާތަކެތީގެ އަދަދު ވަނީ ވަރަށް ބޮޑަށް އިތުރުވެފައެވެ.
