ކުރީގެ ރައީސް މުހައްމަދު ނަޝީދު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޗެއާޕާސަންގެ މަގާމަށް ވާދަކުރައްވަން ނިންމަވައި، ކުރިއަށް އޮތް ރިޔާސީ އިންތިޚާބުގައި ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލަށް ތާއީދުކުރައްވާކަން މިއަދު އިއުލާނުކުރައްވައިފިއެވެ.
“ބޮޑު ބަދަލު” ގެ ނަމުގައި މި ދެ ބޭފުޅުން ގުޅިވަޑައިގެން ބޭއްވި ނޫސްވެރިންގެ ބައްދަލުވުމުގައި، އެމްޑީޕީގެ އާންމު މެންބަރުންގެ ރުހުމާއި ތާއީދު ހޯއްދެވުމުގެ ނިޔަތުގައި ޗެއާޕާސަން ކަމަށް ކުރިމަތިލައްވަން ގަސްދުކުރެއްވި ކަމަށް ނަޝީދު ވިދާޅުވިއެވެ. އަދި 2028ވަނަ އަހަރު އަންނަންދެން މަޑުނުކުރައްވައި، މިހާރުން މިހާރަށް މި ނިޒާމީ ބަދަލުތައް ގެނައުމަށް ސިޔާސީ ފަރާތްތަކާ އެކު މަޝްވަރާކުރުމަށާއި، މުޅި ރާއްޖެއަށް ދަތުރުކޮށް ރައްޔިތުންގެ ބައިވެރިވުން ހޯދުމަށް މަގުމަތީގެ ހަރަކާތްތައް ވެސް ފައްޓަވާނެކަން އެމަނިކުފާނު ހާމަކުރެއްވިއެވެ.
ފައްޔާޒް ވެރިކަމަށް ގެންނަން ނަޝީދު ތާއީދުކުރެއްވި ނަމަވެސް، މުސްތަގުބަލުގައި ދައުލަތުގެ އެންމެ އިސްވެރިޔާގެ ހައިސިއްޔަތުން ގައުމަށް ޚިދުމަތްކުރެއްވުމުގެ ޝައުގުވެރިކަން އަދިވެސް ހުންނެވިކަމަށް ނަޝީދު ވިދާޅުވިއެވެ.
އެމްޑީޕީގެ ތެރޭގައި ރިޔާސީ ޓިކެޓަށް ބޮޑު ވާދަވެރިކަމެއް އުފެދިފައިވާއިރު، ކުރީގެ ރައީސް އިބްރާހީމް މުހައްމަދު ޞާލިޙާއި ޕާޓީގެ ރައީސް ޢަބްދުﷲ ޝާހިދު ވެސް އެކަމަށް ޝައުގުވެރިކަން ފާޅުކުރައްވާފައިވާކަމަށް އަޑުތައް ފެތުރިފައިވެއެވެ. ނިމިދިޔަ ކައުންސިލް އިންތިޚާބަށްފަހު ފައްޔާޒާއި ނަޝީދާ އަދި ޕާޓީގެ ލީޑާޝިޕާ ދެމެދު ކޮންމެވެސް ވަރެއްގެ ނުތަނަވަސްކަމެއް އުފެދުނު ނަމަވެސް، މިހާރު ވަނީ ޕާޓީ ހިންގުން ހަރުދަނާކުރުމަށް އެންމެ އިސް ސަފުގެ ބޭފުޅުން ހިމެނޭހެން ޚާއްސަ ކޮމިޓީއެއް އެކުލަވާލައި، ނަޝީދަށް ގައުމީ މަޖިލީހުން ޖާގަ ދެއްވައި މަސްރަހު ފިނިކުރައްވާފައެވެ.
