މިއަހަރުގެ މިހާތަނަށް ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރި ގައުމެއްގެ ގޮތުގައި ޗައިނާ ދެމިއޮތްއިރު، އެ ގައުމުން އެކަނިވެސް 232,148ފަތުރުވެރިން ވަނީ ރާއްޖެއަށް އައިސްފައެވެ.
ޓޫރިޒަމް މިނިސްޓްރީގެ އެންމެ ފަހުގެ ތަފާސްހިސާބުތައް ދައްކާގޮތުން، 2026ވަނަ އަހަރުގެ އޮގަސްޓް 8ވަނަ ދުވަހުގެ ނިޔަލަށް ރާއްޖެއަށް އައި ޖުމްލަ ފަތުރުވެރިންގެ 18.1އިންސައްތަ ހިއްސާކުރަނީ ޗައިނާ މާކެޓުންނެވެ.
ރަޝިއާ – ދެވަނައަށް އެންމެ ގިނަ ފަތުރުވެރިން އައިސްފައިވަނީ ރަޝިއާއިންނެވެ. އެ ގައުމުން 188,543ފަތުރުވެރިން އައިސްފައިވާއިރު މިއީ ޖުމްލަ ފަތުރުވެރިންގެ 14.7އިންސައްތައެވެ.
އިނގިރޭސިވިލާތް – ތިންވަނައިގައި އޮތް އިނގިރޭސިވިލާތުން 101,391ފަތުރުވެރިން ވަނީ ޒިޔާރަތްކޮށްފައެވެ. މިއީ މާކެޓުގެ %7.9އެވެ.
އެހެނިހެން ގައުމުތައް – ގަދަ 10ގައި ދެން ހިމެނޭ މުހިންމު ގައުމުތަކުގެ ތެރޭގައި އިޓަލީ (82,748ފަތުރުވެރިން)، ޖަރުމަނުވިލާތް (79,531ފަތުރުވެރިން)، އަދި އިންޑިއާ (73,978ފަތުރުވެރިން)ހިމެނެއެވެ.
ކްރޫޒްލައިނާތަކުން އަންނަ ފަސިންޖަރުންގެ އަދަދު އިތުރުވުން
މި އަހަރުގެ ފަތުރުވެރިކަމުގެ ތަފާސްހިސާބުތަކުން ފާހަގަކުރެވޭ އަނެއް މުހިންމު ކަމަކީ ކަނޑުމަގުން، ޚާއްސަކޮށް ކްރޫޒް ލައިނާތަކުގައި ރާއްޖެއަށް ޒިޔާރަތްކުރި މީހުންގެ އަދަދު ވަރަށް ބޮޑަށް އިތުރުވެފައިވުމެވެ. ފާއިތުވި 2025ވަނަ އަހަރުގެ މި މުއްދަތުގައި ކްރޫޒް ފަސިންޖަރުންގެ ގޮތުގައި 8,263މީހުން އައިސްފައިވާއިރު، މިއަހަރުގެ މިހާތަނަށް އެ އަދަދު ވަނީ 15,577އަށް އަރާފައެވެ.
ރާއްޖެ އަށް ޒިޔާރަތްކުރާ ފަތުރުވެރިންގެ ތެރެއިން %73.2މީހުން ޗުއްޓީ ހޭދަކުރަނީ ރިސޯޓުތަކުގައެވެ. އަދި %22.4މީހުން ގެސްޓްހައުސްތަކުގައި ޗުއްޓީ ހޭދަކުރާއިރު، ފަތުރުވެރިންނަށް ޚިދުމަތް ދިނުމަށް ޖުމްލަ 68,322އެނދު މިހާރު ރާއްޖޭގައި އޮޕަރޭޝަންގައި އެބަހުއްޓެވެ.
