އަންނަ އޮކްޓޯބަރު މަހުގެ 27ވަނަ ދުވަހުގެ ނިޔަލަށް ރީ-ރަޖިސްޓްރީ ނުކުރާ ރާއްޖޭގެ ހުރިހާ ނޫސްތަކާއި މަޖައްލާތަކުގެ ރަޖިސްޓްރީ ބާތިލުކުރާނެކަމަށް މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނުން އަންގައިފިއެވެ.
އެ ކޮމިޝަނުން މިކަން ހާމަކުރީ ނޫސް މަޖައްލާތައް ރަޖިސްޓްރީކޮށް ހިންގުމާ ގުޅޭގޮތުން އާންމުކުރި އައު އުސޫލުތަކާ ގުޅިގެން ނެރުނު ބަޔާނެއްގައެވެ. ކުރިން އެކި ވުޒާރާތަކުން މި ދަފްތަރު ބެލެހެއްޓި ނަމަވެސް، މީޑިއާ ކޮމިޝަންގެ ގާނޫނާ އެކު މިހާރު މި ޒިންމާ މަތިކޮށްފައި ވަނީ އެ ކޮމިޝަނަށެވެ. އެހެންކަމުން، އައު ގަވާއިދަށް އަމަލުކުރަން ފަށާތާ ހަ މަސްދުވަހުގެ ތެރޭގައި، މީގެ ކުރިން ރަޖިސްޓްރީކޮށްފައިވާ ހުރިހާ ފަރާތްތަކުން ވެސް އަލުން ރެކޯޑުތައް އާކުރަން ޖެހެއެވެ.
މި ގަވާއިދުގައި މީޑިއާތައް މައިގަނޑު ހަތަރު ބަޔަކަށް ބަހާލާފައިވެއެވެ. އޭގެ ތެރޭގައި ޖާނަލް، ނިއުސްލެޓަރ، މަޖައްލާ އަދި ނޫސް ހިމެނޭއިރު، މިއިން ކޮންމެ ބާވަތެއް ވެސް ޕްރިންޓް، ވެބްސައިޓް، އެޕްލިކޭޝަން، އިލެކްޓްރޯނިކް މީޑިއާ އަދި ސޯޝަލް މީޑިއާ މެދުވެރިކޮށް ހިންގުމުގެ ފުރުސަތު އޮވެއެވެ. ވިޔަފާރިތަކަށާއި ކޯޕަރޭޓިވް ސޮސައިޓީތަކަށް ވެސް މި ހުއްދަ ދޫކުރާގޮތަށް ހަމަޖެހިފައިވާއިރު، މުއައްސަސާތަކުގެ އެތެރޭގައި މުވައްޒަފުންނަށް ޚާއްސަކޮށްގެން ނެރޭ ކުދި ލިޔުންތަކާއި މަޖައްލާތައް މީގެ ތެރެއިން އިސްތިސްނާވާނެއެވެ.
ކޮމިޝަނުން އަލަށް ދޫކުރާ ރަޖިސްޓްރީގެ މުއްދަތަކީ ފަސް އަހަރު ދުވަހެވެ. އަދި މުއްދަތު ހަމަވުމުގެ 90 ދުވަސް ކުރިން ރަޖިސްޓްރީ އައުކުރަން ހުށަހަޅަން ޖެހޭނެކަމަށް އުސޫލުގައި ބަޔާންކޮށްފައިވެއެވެ. މީގެ އިތުރުން، ވިދިވިދިގެން 12 މަސް ދުވަސް ވަންދެން އެއްވެސް އެއްޗެއް ޝާއިއުނުކޮށްފިނަމަ، އެ ނޫހެއް ނުވަތަ މަޖައްލާއެއްގެ ރަޖިސްޓްރީ އަމިއްލައަށް ބާތިލުވެގެންދާނެކަމަށް ވެސް މި ގަވާއިދުގައި ވަނީ ކަނޑައަޅާފައެވެ.
