ރައްޔިތުންގެ ކަންބޮޑުވުންތައް ގާތުން އަޑުއެއްސެވުމަށް ރައީސުލްޖުމްހޫރިއްޔާގެ އޮފީހުގައި އަލަށް ޤާއިމުކުރެއްވި “ސިޓިޒަންސް ކޮމްޕްލެއިންޓްސް ބިއުރޯ” އަށް ހުށަހަޅާ ކޮންމެ މައްސަލައަކަށް ސަރުކާރުން ފުރިހަމައަށް ޖަވާބުދާރީވާނެކަމުގެ ޔަޤީންކަން، ރައީސް އޮފީހުގެ ތަރުޖަމާނު މުޙައްމަދު ޙުސައިން ޝަރީފް (މުންދު) ދެއްވައިފިއެވެ.
ޕީއެސްއެމް މިއުސްއަށް ދެއްވި ބަސްދީގަތުމެއްގައި ވާހަކަފުޅުދައްކަވަމުން ތަރުޖަމާނު ވިދާޅުވީ، ރައްޔިތުންނާ ގާތުން ވެރިކަން ކުރުމުގެ ވިސްނުންފުޅުގެ ދަށުން ރައީސް ޑރ. މުޙައްމަދު މުޢިއްޒު އުފެއްދެވި މި އިދާރާގެ ހަގީގީ މަންފާ ލިބިގެންދާނީ އާންމުން އެފަރާތްތަކުގެ ތަކުލީފުތައް ހިއްސާކުރުމުން ކަމަށެވެ. އެހެންކަމުން، ސަރުކާރުގެ ސިޔާސަތުތަކާމެދު ނުވަތަ ފޯރުކޮށްދޭ ޚިދުމަތަކާމެދު ހިތްހަމަނުޖެހޭނަމަ، ފަސްޖެހުމެއްނެތި އެކަންކަން މި ބިއުރޯއަށް ހުށަހެޅުއްވުމަށް އޭނާ ވަނީ އިލްތިމާސްކުރައްވާފައެވެ.
ކުރިއަރާފައިވާ ޑިމޮކްރެޓިކް މުޖުތަމަޢުތަކެކޭ އެއްފަދައިން، ރާއްޖޭގައި ވެސް މިފަދަ ނިޒާމެއް އޮތުމަކީ ރައްޔިތުން ބާރުވެރިކުރުވުމަށް އެޅޭ ވަރަށް މުހިންމު ފިޔަވަޅެއްކަން މުންދު ފާހަގަކުރެއްވިއެވެ. މިއީ ހަމައެކަނި ނަމެއްގައި ހަދާފައިވާ ތަނެއް ނޫންކަމަށާއި، މިއީ ރައްޔިތުންގެ އަޑުއައްސަވާނެކަމަށް ރައީސް ވެވަޑައިގެންނެވި ވަޢުދުފުޅު ފުއްދެވުމަށް އެޅުއްވި އަމަލީ ފިޔަވަޅެއްކަމަށް ވެސް އޭނާ ވިދާޅުވިއެވެ.
ސައުވީސް ގަޑިއިރު ޚިދުމަތްދޭ ކޯލް ސެންޓަރަކާ އެކު ހިންގާ މި ބިއުރޯގެ މައިގަނޑު އަމާޒަކީ، ތަފާތު މަންސަތައް މެދުވެރިކޮށް އާންމުން ހުށަހަޅާ ޝަކުވާތައް ޒަމާނީ ޑިޖިޓަލް ނިޒާމެއްގެ ތެރެއިން ބަލަހައްޓައި، ކަމާބެހޭ މުއައްސަސާތަކާ ގުޅިގެން އެކަންކަމަށް އަވަސް ހައްލެއް ހޯދައިދިނުމެވެ.
