ނުކުޅެދުންތެރިކަން ހުންނަ ފަރާތްތަކުގެ ހުނަރުތައް ތަރައްގީކޮށް ކުރިއެރުވުމަށް ޕްރޮގްރާމްތައް ހިންގުމަށް ތަރައްގީކުރާ “ކޮމިއުނިޓީ އެމްޕަވަމަންޓް ހަބް” އަންނަ މަހު ހުޅުވުމަށް ތައްޔާރުވަމުންދާކަމަށް ހެލްތު މިނިސްޓަރު ގީލާ އަލީ މިއަދު ވިދާޅުވެއްޖެ އެވެ.
މިނިސްޓަރު އެފަދައިން ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.
“ކޮމިއުނިޓީ އެމްޕަވަމަންޓް ހަބް ނުވަތަ މި މަރުކަޒަކީ، އިސްލާމީ ކަންތައްތަކާ ބެހޭ ވުޒާރާގެ ޒަކާތު ފަންޑުން ޚަރަދުކޮށް، ހެލްތު މިނިސްޓްރީއާއި ފަހި ދިރިއުޅުން ކޯޕަރޭޝަން(އެފްޑީސީ)ގުޅިގެން ހަދަމުންދާ މަރުކަޒެކެވެ. ރާއްޖޭގައި ނުކުޅެދުންތެރިކަން ހުންނަ ފަރާތްތަކަށް ދެމުންދާ ހިދުމަތްތައް ހަރުދަނާކޮށް، އެ ފަރާތްތަކަށް މުޖްތަމައުގައި ފަސޭހަކަމާއެކު އުޅުމަށް އިސްކަންދީގެން މި ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ.
” މި މަރުކަޒު އޮކްޓޫބަރު މަހު ހުޅުވުމަށް ދަނީ ތައްޔާރުވަމުން. މި މަރުކަޒުގެ ބޭނުމަކީ ނުކުޅެދުންތެރިކަން ހުންނަ ފަރާތްތަކަށް ބޭނުންވާ ހުނަރާއި އިލްމު ފަހިކޮށްދިނުން. އަދި މިހާރުވެސް ކުރިއަށް އެބަގެންދެވޭ ސައިން ލޭންގުއޭޖް ޕްރޮގްރާމެއް. ވޮކެބްލަރީއެއް ތައާރަފްކުރުމުގެ މަސައްކަތް އެފަދަ ވޯކްޝޮޕެއްގެ މަސައްކަތް އެބަދޭ.” މިނިސްޓަރު ވިދާޅުވިއެވެ.
40-18 އަހަރާއި ދެމެދުގެ އުމުރުފުރާގެ މީހުންނަށް ހިދުމަތް ދިނުމަށް އަމާޒުކޮށް 5500 އަކަފޫޓުގެ ޖާގައެއްގައި ހުޅުމާލެ ފޭސް 2ގައި ހުޅުވާ އެ ހަބުގައި ހުންނާނެ ބައިތަކުގެ ތެރޭގައި ހޮސްޕިޓަލިޓީ އަދި ކަލިނަރީ ތަމްރީނާއި، މަސައްކަތުގެ ތަޖުރިބާ ފޯރުކޮށްދިނުމަށް އިންކްލޫސިވް ކެފޭއެއްގެ އިތުރުން ނުކުޅެދުންތެރިކަން ހުންނަ ފަރާތްތައް އުފައްދާ ތަފާތު ތަކެތި މާކެޓުކޮށް ވިއްކުމަށް އާންމުންނަށް ހުޅުވާލާފައިވާ ފިހާރައެއް ހިމެނެ އެވެ.
އޭގެ އިތުރުން ހަބުގެ ހަރަކާތްތަކުގައި ބައިވެރިވާ ފަރާތްތަކުގެ ޝައުގުވެރިކަމާއި ގުޅުންހުރި އަދި ހުނަރު ތަރައްގީ ކުރުމަށް ތަފާތު ޕްރޮގްރާމްތައް ހިންގުމަށް ހަބުގައި ތިން ވޯކްޝޮޕް ޖާގައެއްގެ އިތުރުން، ކޮމްޕިއުޓަރާއި އިންފޮމޭޝަން ޓެކްނޮލޮޖީގެ ތަމްރީން ދޭ ތަނެއް ހިމެނެއެވެ. އޭގެ އިތުރުން އިޖުތިމާޢީ ގުޅުން ބަދަހި ކުރުމަށް ތަފާތު ހަރަކާތްތައް ހިންގުމަށް އެކްޓިވިޓީ ރޫމާއި، މަލްޓި މީޑިއާ ރޫމެއްވެސް އެ ހަބުގައި ހުންނާނެ އެވެ.
