ފުލުހަކަށް ހަމަލާ ދީ ބިރު ދެއްކި މީހަކު ހައްޔަރުކޮށްފިއެވެ.
ކްރިމިނަލް ކޯޓުން މިއަދު ނެރުނު ބަންދު އަމުރުގައިވާ ގޮތުން އެ މައްސަލައިގައި ހައްޔަރުކުރީ ކ. މާފުށި/ ގްރީން ޕާކު/ މުހައްމަދު ޝައިހާން (21އ)އެވެ.
އެ މައްސަލައިގައި ޝައިހާން ދޫކޮށްލުމަށް އެދުނު ނަމަވެސް ކޯޓުން ވަނީ އޭނާ 20ދުވަހަށް ބަންދުކުރަން އަމުުރުކޮށްފައެވެ.
ބަންދު އަމުރުގައި ބުނެފައިވާ ގޮތުން ޝައިހާން ވަނީ ފުލުހެއްގެ ބޮލުގައާއި ގައިގައި ޖަހައިފައެވެ.
އެހެންވެ އޭނާގެ މައްޗަށް ކުރަނީ ގާނޫނު ތަންފީޒުކުރަން ހުރަސް އެޅުމާއި ޖެހުމާއި ބިރު ދެއްކުމުގެ ތުހުމަތެވެ.
ބަންދު އަމުރުގައި ބުނެފައިވާ ގޮތުން އެ މައްސަލައިގައި އަނިޔާ ލިބުނު ފުލުސް މީހާގެ ބަޔާނާއި ސީނަށް ދިޔަ ފުލުހުންނަށް ލިބުނު އަނިޔާގެ ފޮޓޯ ހިމެނޭ ރިޕޯޓާއި އަނިޔާ ލިބުނު ފުލުހުންގެ މެޑިކަލް ލީގަލް ރެކޯޑްސް ހެކީގެ ގޮތުގައި ހުށަހަޅާފައިވެއެވެ.
