މިދިޔަ އަހަރުގެ އޮގަސްޓް މަހާ އަޅާބަލާއިރު މި އަހަރުގެ އޮގަސްޓް މަހު ދައުލަތަށް ޑޮލަރުން ލިބުނު އާމްދަނީ ވަނީ 14.0 އިންސައްތަ އިތުރުވެފައެވެ.
މޯލްޑިވްސް އިންލެންޑް ރެވެނިއު އޮތޯރިޓީ (މީރާ)އިން ބުނީ މިއަހަރުގެ އޮގަސްޓް މަހު ޑޮލަރުގެ އާމްދަނީގެ ގޮތުގައި ޖުމްލަ 98.08 މިލިއަން ޑޮލަރު ވަނީ ލިބިފައެވެ. ޑޮލަރުގެ އާމްދަނީން އެންމެ ބޮޑު ހިއްސާއެއް ވަނީ ފަތުރުވެރިކަމުގެ ދާއިރާއިން ނަގާ ޖީއެސްޓީ (ޓީޖީއެސްޓީ) އިންނެވެ. އެއީ 52.2 އިންސައްތައެވެ. ދެން އެންމެ ބޮޑު އާމްދަނީއެއް ލިބިފައި ވަނީ ގްރީން ޓެކްސް (13.3 އިންސައްތަ) އަދި އިންކަމް ޓެކްސް (12.4 އިންސައްތަ) އިންނެވެ. މީގެ އިތުރުން އެއާޕޯޓް ޑިވެލޮޕްމަންޓް ފީ (9.7 އިންސައްތަ) އަދި ޑިޕާޗާ ޓެކްސް (9.6 އިންސައްތަ) ހިމެނެއެވެ.
އާމްދަނީ އިތުރުވި މައިގަނޑު ސަބަބުތަކުގެ ތެރޭގައި، 2026ވަނަ އަހަރުގެ އިންކަމް ޓެކްސްގެ ފުރަތަމަ އިންޓެރިމް ޕޭމަންޓް ދެއްކުމުގެ ސުންގަޑި ރަސްމީ ބަންދު ދުވަހަކާ ދިމާވުމުން އޮގަސްޓް މަހުގެ 2ވަނަ ދުވަހަށް ފަސްކުރުން ހިމެނެއެވެ. މީގެ ސަބަބުން ކޯޕަރޭޓް އިންކަމް ޓެކްސް، ބޭންކް އިންކަމް ޓެކްސް އަދި ޕާސަނަލް އިންކަމް ޓެކްސް ވަނީ މިދިޔަ އަހަރަށްވުރެ ބޮޑުތަނުން އިތުރުވެފައެވެ.
މީގެ އިތުރުން، އޮގަސްޓް މަހު ރާއްޖެއަށް ފަތުރުވެރިން ޒިޔާރަތްކުރި މިންވަރު 1.9 އިންސައްތަ ދަށްވި ނަމަވެސް، ކުރިން ނުލިބި ހުރި ޓީޖީއެސްޓީގެ ގިނަ ފައިސާ ތަކެއް މި މަހު ހޯދިފައިވުމުން ޓީޖީއެސްޓީން ލިބުނު އާމްދަނީ ވަނީ ވަރަށް ބޮޑަށް އިތުރުވެފައެވެ. އަދި މިދިޔަ އަހަރުގެ އޮގަސްޓް މަހު ނުލިބޭ “ލީސް ޕީރިއަޑް އެކްސްޓެންޝަން ފީ”ގެ ފައިސާ މިއަހަރުގެ އޮގަސްޓްގައި ލިބިފައިވުމާއި، ވާރކް ޕާމިޓް ފީ ލިބުނު މިންވަރު ވެސް ވަރަށް ބޮޑަށް އިތުރުވުމަކީ ޑޮލަރުގެ އާމްދަނީ މައްޗަށް ދިޔަ ސަބަބުތަކެއްކަމަށް މީރާގެ ރިޕޯޓުގައި ފާހަގަކޮށްފައިވެއެވެ.
