ބޭންކް އޮފް މޯލްޑިވްސް (ބީއެމްއެލް)ގެ ކާޑުތައް ބޭނުންކޮށްގެން ބައިނަލްއަޤްވާމީ އީކޮމާސް ޕްލެޓްފޯމްތަކުން ބޭރު ފައިސާއިން މުޢާމަލާތްކުރެވޭ މިންވަރު އެ ބޭންކުން ވަރަށް ބޮޑަށް އިތުރުކޮށްފިއެވެ.
އާންމުންގެ އެންމެ ބޮޑު އެއް ޝަކުވާއަކަށް ވެފައިވާ ޑޮލަރު ލިމިޓުގެ މައްސަލައަށް މި ލުޔެއް ލިބިގެންދިޔައީ، މިދިޔަ އަންގާރަ ދުވަހު ބީއެމްއެލްއިން ތަޢާރަފުކުރި ޑޮލަރު އިންވެސްޓްކުރުމުގެ ޚިދުމަތުގެ ސަބަބުންނެވެ. ބީއެމްއެލްގެ ހެޑް އޮފް ބްރޭންޑިންގ އެންޑް މާކެޓިންގ ސްޓްރެޓެޖީ މުޙައްމަދު ސަޢީދު، ޕީއެސްއެމްގެ “ރާއްޖެ މިއަދު” ޕްރޮގްރާމްގައި ވިދާޅުވި ގޮތުގައި، މި ބަދަލާއެކު ކަސްޓަމަރުންނަށް ކަނޑައެޅިފައިވާ ދުވަހުގެ ލިމިޓުތައް މިހާރު ވަނީ ފުޅާކުރެވިފައެވެ. އަދި ކުރިން ވަރަށް އަވަހަށް ލިމިޓު ހުސްވާ ޕްލެޓްފޯމްތައް ކަމަށްވާ ޝެއިން، ޓީމޫ އަދި އަލީ އެކްސްޕްރެސް ފަދަ ވެބްސައިޓުތަކުން މިހާރު ފަސޭހަކަމާ އެކު ޕޭމަންޓްތައް ހެދެމުންދާކަން އޭނާ ފާހަގަކުރެއްވިއެވެ.
ބޭންކަށް ބޭރު ފައިސާ ވަންނާނެ އިތުރު މަގުތަކެއް ތަނަވަސްކުރުމުގެ ބޭނުމުގައި ފެށި މި އިންވެސްޓްމަންޓް ސްކީމްގައި މައިގަނޑު ތިން ގިންތިއެއް ހިމެނެއެވެ. އެއީ ގޯލްޑް، ސިލްވަރ އަދި ބްރޯންޒް ކެޓަގަރީއެވެ. މި އޮޕްޝަންތަކުގެ ދަށުން އިންވެސްޓްކުރާ ޑޮލަރަށްވާ ދިވެހި ފައިސާ ވަގުތުން ކަސްޓަމަރުގެ އެކައުންޓަށް ޖަމާކޮށްދޭއިރު، އިންވެސްޓްމަންޓުން ލިބޭ ނަފާ އޭގެ އަނެއް ދުވަހު ޖަމާކޮށްދޭނެއެވެ. ބީއެމްއެލްއިން ހާމަކުރާ ގޮތުގައި މި ޕޫލްތަކުން 25 އިންސައްތައާ ހަމައަށް ފައިދާ ލިބުމުގެ ފުރުސަތު އޮންނާނެއެވެ.
މި އައު ނިޒާމުގެ ސަބަބުން މައިގަނޑު ތިން ފަރާތަކަށް މަންފާކުރާނެކަމަށް ސަޢީދު ވިދާޅުވިއެވެ. އެއީ އިންވެސްޓްކުރާ ކަސްޓަމަރުންނާއި، ބޭންކުގެ އިތުރުން އޮންލައިންކޮށް ވިޔަފާރިކުރާ އާންމު ރައްޔިތުންނެވެ. އިންވެސްޓްމަންޓް ސްކީމް ހުޅުވާލިތާ ފުރަތަމަ 24 ގަޑިއިރުގެ ތެރޭގައި ވެސް، ކުރިން ޚިދުމަތް ދެވުނު މިންވަރަށްވުރެ ގިނަ ބަޔަކަށް ކާޑުގެ މުޢާމަލާތްތައް ފުރިހަމަކުރުމުގެ ފުރުސަތު ލިބިގެންދިޔަކަން ބޭންކުން ވަނީ ކަށަވަރުކޮށްދީފައެވެ.
ދިވެހިން އެންމެ ގިނައިން ބޭނުންކުރާ 6 އީކޮމާސް ޕްލެޓްފޯމަކުން މަހެއްގެ މައްޗަށް އެންމެ ގިނަވެގެން ކުރެވޭނީ 30 މުޢާމަލާތްކަމަށް ކަނޑައަޅައި، ކާޑުތަކުގެ ލިމިޓަށް ބީއެމްއެލްއިން ހަރުކަށި ބަދަލުތަކެއް ގެނެސްފައި ވަނީ މިއަހަރުގެ މެއި މަހުގެ ތެރޭގައެވެ. ނަމަވެސް އަލަށް އެޅުނު ފިޔަވަޅުތަކާ އެކު، އޮންލައިންކޮށް ވިޔަފާރިކުރާ ފަރާތްތަކަށް މިހާރު ވަނީ ބޮޑު ތަސައްލީއެއް ލިބިފައެވެ.
