ރަސްމާލެ ތަރައްޤީކުރުމުގެ ބިޔަ މަޝްރޫޢު ހިންގުމުގައި ދިވެހި ސަރުކާރުން ގެންގުޅުމަށް ކަނޑައަޅާފައިވާ ޤާނޫނީ އޮނިގަނޑާއި ސިޔާސަތުތަކަށް، ކުރީގެ ރައީސުލްޖުމްހޫރިއްޔާ މުޙައްމަދު ނަޝީދު މިއަދު ފުރިހަމައަށް ތާއީދުކުރައްވައި އެކަން ހާމަކުރައްވައިފިއެވެ.
މީސްމީޑިއާ އެކްސްގައި ކުރެއްވި ޕޯސްޓެއްގައި މި މޭރުމުން ވާހަކަފުޅުދައްކަވަމުން ކުރީގެ ރައީސް ނަޝީދު ވަނީ، ރައްޔިތުންގެ މަޖިލީހުގައި ސަރުކާރަށް ލިބިފައިވާ ފުރިހަމަ އަޣުލަބިއްޔަތުގެ ބޭނުންހިފައި، މި މަޝްރޫޢަށް ބޭނުންވާ ޤާނޫނީ އޮނިގަނޑުތައް ވީހާ ވެސް އަވަހަކަށް ފާސްކުރުމަށް ގޮވާލައްވާފައެވެ. އަދި ބޭރުގެ ފަރާތްތަކަށް ރާއްޖެއިން އާބާދުވެވޭނެ ފަދަ “ރެސިޑެންސީ ޕްރޮގްރާމެއް” ތަޢާރަފުކުރުމަކީ އުސޫލެއްގެ ގޮތުން އެމަނިކުފާނު ތާއީދުކުރައްވާ އަދި ރާއްޖެއަށް ފައިދާހުރި ކަމެއްކަމުގައި ވެސް ފާހަގަކުރެއްވިއެވެ.
Usoolee gothun residency program akah Raajje hulhuvaalumakee rangalhu kameh. Namaves Eagle Hills ge contract adhi eh nufeney, haama eh nukurey. Mihaathanah ivunu vaahakathakun alhugandah othee 2 massalaeh; 1. Advance faisaa nulibun. 2. Male’ sarahadhugai e than hadhaakan.…
— Mohamed Nasheed (@MohamedNasheed) September 29, 2026
ރައީސް ނަޝީދު މިފަދައިން ވިދާޅުވެފައި މިވަނީ، ރަސްމާލެ މަޝްރޫޢާ ގުޅުވައިގެން އިދިކޮޅު ފަރާތްތަކުންނާއި ކުރީގެ ރައީސް ޢަބްދުﷲ ޔާމީން ޙަޤީޤަތާ ޚިލާފު ވާހަކަތަކެއް ފަތުރަމުންދާތީ، ބަންޑާރަނައިބު އަޙްމަދު އުޝާމް އެކަންކަން ސާފުކޮށްދެއްވާފައިވާ ދަނޑިވަޅެއްގައެވެ. ބަންޑާރަނައިބު ވިދާޅުވެފައިވާ ގޮތުގައި، މިހާތަނަށް ސޮއިކުރެވިފައި ވަނީ ހަމައެކަނި “ލެޓަރ އޮފް އިންޓެންޓް” ނުވަތަ ކޮމާޝަލް ޓަރމްސް އެއްބަސްވުމެއްގައެވެ.
ސަރުކާރުން އެއްވެސް ކަމެއް ޤާނޫނުއަސާސީއާ ޚިލާފަށް ނުކުރާނެކަމުގެ ޔަޤީންކަން ދެއްވަމުން އުޝާމް ވިދާޅުވީ، މި މަޝްރޫޢު ކުރިއަށްދާނީ އަލަށް އެކުލަވާލެވޭ ރިއަލް އެސްޓޭޓް ޤާނޫނުގެ ދަށުން ކަމަށެވެ. އަދި އަމަލީ މަސައްކަތް ފެށުމުގެ ކުރިން، ގުޅުންހުރި ޤާނޫނުތައް މަޖިލީހުން ފާސްކޮށް، އިތުރު މަޝްވަރާތަކަށް ފަހު ފުރިހަމަ އެއްބަސްވުމެއްގައި ސޮއިކުރެވޭނެކަން ވަނީ ހާމަކުރައްވާފައެވެ.
ރަސްމާލެ މަޝްރޫޢަށް ތާއީދުކުރެއްވި ނަމަވެސް، ރައީސް ނަޝީދު ވަނީ ބައެއް ކަންބޮޑުވުންތައް ވެސް ހިއްސާކުރައްވާފައެވެ. އެގޮތުން، އީގަލް ހިލްސް ކުންފުންޏާ އެކު ވެފައިވާ އެއްބަސްވުން އާންމުކޮށްފައި ނުވާކަން ފާހަގަކުރައްވައި، އެމަނިކުފާނު ވިދާޅުވީ މި މަޝްރޫޢަށް އެޑްވާންސްކޮށް ފައިސާ ލިބިފައި ނެތުމާއި، މާލެ ސަރަހައްދުގައި މިފަދަ ބޮޑު މަޝްރޫޢެއް ހިންގުމަކީ ވިސްނާލަންޖެހޭ މައްސަލަތަކެއް ކަމަށެވެ.
