ހިޔާ ފްލެޓުތަކުގައި ދިރިއުޅޭ އާއިލާތައް ބޮޑުވެ، ޖާގައިގެ ދަތިކަން ކުރިމަތިވެފައިވާ ފަރާތްތަކަށް ބޯހިޔާވަހިކަމުގެ އިތުރު ފުރުސަތުތައް ފަހިކޮށްދެއްވުމަށް ސަރުކާރުން މަސައްކަތްކުރައްވަމުން ގެންދަވާކަމަށް، ބިނާރާ ގެދޮރުވެރިކަމާއި އުމްރާނީ ތަރައްގީއާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ.
ހިޔާ ޓަވަރުތަކަށް އިތުރުކުރެވުނު ލިފްޓުތަކުގެ މަސައްކަތް ނިމުން ފާހަގަކުރުމަށް ބޭއްވި ރަސްމިއްޔާތެއްގައި ވާހަކަފުޅުދައްކަވަމުން ވަޒީރު ވިދާޅުވީ، ދެ ކޮޓަރީގެ އެޕާޓްމަންޓުތަކުގައި ދިރިއުޅޭ އާއިލާތަކުގެ މެންބަރުން އިތުރުވެ، އެހެން ތަންތަނަށް ބަދަލުވާން ގިނަ ބަޔަކު މިހާރު ބޭނުންވާކަމަށެވެ. އެހެންނަމަވެސް، އެއްވެސް ބޯހިޔާވަހިކަމެއް ނެތް ފަރާތްތަކަށް ފުރަތަމަ އިސްކަންދޭންޖެހޭކަން ފާހަގަކުރައްވައި، އޭގެ ފަހުން ހިޔާގެ ރައްޔިތުންނަށް ދިމާވެފައިވާ ދަތިތައް ހައްލުކޮށް، ތަނަވަސް ދިރިއުޅުމެއް ހޯދައިދިނުމަށް ސަރުކާރުން އިސްކަންދޭނެކަމުގެ ޔަޤީންކަން އެމަނިކުފާނު ދެއްވިއެވެ.
ކޮންމެ ޓަވަރެއްގައި ގާތްގަނޑަކަށް ދެހާހެއްހާ މީހުން ދިރިއުޅޭއިރު، އެ ރައްޔިތުންނަށް ފަސޭހަ ގޮތްތައް ހަމަޖައްސައިދިނުމަކީ ދައުލަތުގެ މުހިންމު އަމާޒެކެވެ. ބޮޑު އާބާދީއަކަށް ބޭނުންވާ ޚިދުމަތްތައް ފޯރުކޮށްދިނުމުގައި ހުރި ގޮންޖެހުންތަކަށް އަލިއަޅުއްވާލައްވަމުން ޑރ. މުއްޠަލިބު ވިދާޅުވީ، ހުސްކޮށް ހުރި ބިންތަކުން ގޯތި ދޫކޮށްފައިވުމުގެ ސަބަބުން ޖާގައިގެ ދަތިކަން އިންތިހާއަށް ކުރިމަތިވެފައިވާކަމަށެވެ. ގެދޮރުވެރިކަމާ ބެހޭ ވުޒާރާއިން ހާމަކުރައްވާފައިވާ ގޮތުގައި، ކުރީގެ މަޝްރޫޢުތައް ކުރިއަށްގެންގޮސްފައި ވަނީ ދުރުރާސްތާގެ އެކަށީގެންވާ ޕްލޭނަކާ ނުލައެވެ. އޭގެ ނަތީޖާއެއްގެ ގޮތުން، މިހާރު ތިބި ތަން ދޫކޮށް އެހެން ތަންތަނަށް ބަދަލުވާން ބޭނުންވާ ފަރާތްތައް ވެސް ގިނަކަން އެ ވުޒާރާއިން ވަނީ ފާހަގަކުރައްވާފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެން ވަނީ ހިޔާ ރައްޔިތުންނަށް ބޮޑެތި ލުއިތަކެއް ހޯދައިދެއްވާފައެވެ. އެގޮތުން، އަމިއްލަ ޖީބުން ކުރި ޚަރަދުގެ ބަދަލެއްގެ ގޮތުން 200،000 ރުފިޔާ އުނިކޮށްދެއްވުމާއި، މަހު ކުލި ކުޑަކޮށްދެއްވުމުގެ އިތުރުން، ބަލިމީހުން އުފުލަން ފަސޭހަވާނެހެން ސްޓްރެޗަރ އެރުވޭ ވަރުގެ ޖާގަ ތަނަވަސް އައު ލިފްޓުތަކެއް ކޮންމެ ޓަވަރެއްގައި މިހާރު ވަނީ ހަރުކޮށްދެއްވާފައެވެ.
