އިދިކޮޅުން ކިތަންމެ ގޭމެއް ކުޅުނަސް ޑޮލަރު މައްސަލަ މި ސަރުކާރުން ހައްލުކުރާނެ ކަމަށް ފޭދޫ އުތުރު ދާއިރާގެ މަޖިލިސް މެމްބަރު އިސްމާއިލް ނިޒާރު ވިދާޅުވެއްޖެއެވެ.
ނިޒާރު އެފަދައިން ވިދާޅުވީ މިއަދު ފޭސްބުކުގައި ކުރެއްވި ޕޯސްޓެއްގައެވެ.
އޭނާ ވިދާޅުވީ ސަރުކާރުން އުއްމީދުކުރަނީ އަދި ކުރަންވީ ވެސް ދަރަނިވެރި ކޮށްފައި އޮތް މި ގައުމު އެ ދަރަނިން ސަލާމަތް ކުރުމަށް ކަމަށެވެ. އަދި ވިއްކާލައިފައި ހުރި ދިވެހި ދައުލަތުގެ ހަރުމުދާ އަލުން ދިވެހި ދައުލަތަށް ނެގުމަށް ކަމަށް ވެސް ވިދާޅުވިއެވެ.
އޭނާ ފާހަގަކުރެއްވި ގޮތުގައި މި ސަރުކާރުން ތިން އަހަރުގެ ތެރޭގައި 1.2ބިލިއަނަށް ވުރެ ގިނަ ޑޮލަރުގެ ދަރަނި ދައްކާފައިވެއެވެ. އަދި އެއާއެކު ކުރިން ދަރަންޏަށް ރަހުނުކޮށްފައި އޮތް ދަރުމަވަންތަ ހޮސްޕިޓަލް، ވެލާނާ ބިލްޑިން، އިސްކަންދަރު ސްކޫލު، ޕޮލިސް ބިލްޑިން، އޮލިމްޕަސް ފަދަ ތަންތަން މިހާރު އަނބުރާ ލިބިފައިވާކަމަށް ވެސް އޭނާ ވިދާޅުވިއެވެ.
“މިހާރު އޮތް ޑޮލަރުގެ މައްސަލަ ވެސް އިދިކޮޅުން ކިތަންމެ ގޭމެއް ކުޅުނަސް މި ސަރުކާރުން ހައްލުކުރާނެ، ރަސްމާލެވެސް އިރާދަ ކުރެއްވިއްޔާ ހަގީގަތަކަށް ހަދާނެ. އައްޑޫ ލިންކް ރޯޑް ވެސް ހަދާނެ”ނިޒާރު ވިދާޅުވިއެވެ.
ޑޮލަރުގެ ދަތިކަން ހައްލުކުރަން މި ސަރުކާރުން މިހާރު ވަނީ ރިސޯޓްތަކުން ޑޮލަރުން ލިބޭ އާމްދަނީ 40ޕަސެންޓްވެސް ސަރުކާރަށް މާރުކުރަން ޖެހޭ ގޮތަށް ހަދައިފައެވެ.
