“އޮޕަރޭޝަން ކުރަނގި”ގެ ދަށުން، މިހާތަނަށް ރާއްޖޭގައި ތިބި ބިދޭސީންގެ ތެރެއިން 95 އިންސައްތަ މީހުންގެ ބަޔޯމެޓްރިކް މައުލޫމާތު އެއްކޮށްފައިވާކަން، ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު ޢަލީ އިޙްސާން ހާމަކުރައްވައިފިއެވެ.
ޕީއެސްއެމްގެ “އަހާ ފޯރަމް” ގައި ވަޒީރު އިޙުސާން ފާހަގަކުރެއްވި ގޮތުގައި މި ސަރުކާރުން ވެރިކަމާ ހަވާލުވިއިރު ބިދޭސީންގެ ރެކޯޑުތައް އޮތީ ވަރަށް ބޮޑަށް އޮޅުންބޮޅުންވެފައެވެ. އެގޮތުން އޭރު ރާއްޖޭގައި ދިރިއުޅެމުންދިޔަ 2،95،000 ބިދޭސީންގެ ތެރެއިން އިނގިލީގެ ނިޝާން ފަދަ މުހިންމު މައުލޫމާތު ނެގިފައި ވަނީ އެންމެ 22،000 މީހުންގެއެވެ. ނަމަވެސް މިހާރު ހުރިހާ ބިދޭސީންގެ މައުލޫމާތު ކަށަވަރުކުރެވި، އޭގެ ތެރެއިން 95 އިންސައްތަ މީހުންގެ ބަޔޯމެޓްރިކްސް ވަނީ ނަގާފައެވެ. ރާއްޖޭގައި މިވަގުތު ނެތް ހަތަރު އިންސައްތަ އުނިކުރުމުން، ދެން ބާކީ އޮތީ އެންމެ އެއް އިންސައްތަ މީހުންގެ މައުލޫމާތު އެއްކުރުމެވެ. މި ބޮޑު ކާމިޔާބީއާ އެކު ދިވެހިރާއްޖެ މިހާރު ހިމެނިފައި ވަނީ ސިންގަޕޫރާއި ޔޫއޭއީ ފަދައިން ބިދޭސީންގެ ބަޔޯމެޓްރިކްސް ފަސޭހައިން ދެނެގަނެވޭނެ ހަރުދަނާ ނިޒާމެއް ޤާއިމުވެފައިވާ މަދު ޤައުމުތަކުގެ ލިސްޓުގައެވެ.
ތިން އަހަރު ދުވަހަށް ބަހާލައިގެން ކުރިއަށްގެންދާ މި އޮޕަރޭޝަނުގެ ދެވަނަ މަރުހަލާގެ މަސައްކަތްތައް މިހާރު ފެށިފައިވާއިރު، މައިގަނޑު އަމާޒަކީ ގަވާއިދާ އެއްގޮތަށް އުޅޭ މީހުންނާއި ޤަވާއިދާ ޚިލާފަށް އުޅޭ މީހުން ވަކިކުރުމެވެ. ވިސާގެ ފައިސާ ދައްކާފައިވީ ނަމަވެސް، ޤަވާއިދާ ޚިލާފަށް އުޅޭނަމަ އެފަދަ ފަރާތްތައް ހައްޔަރުކުރުމުގެ އޮޕަރޭޝަންތައް ދަނީ ހިންގަމުންނެވެ. އޭގެ އެއް މިސާލެއްގެ ގޮތުން، އިމިގްރޭޝަނާއި ފުލުހުން ގުޅިގެން އއ. ތޮއްޑޫގައި ދާދިފަހުން ހިންގި ހަރަކާތެއްގައި ފަސްސަތޭކައެއްހާ ބިދޭސީން ބަލައިފާސްކޮށް، ޤަވާއިދާ ޚިލާފަށް އުޅުނު 107 މީހަކު ވަނީ ބެލުމުގެ ދަށަށް ގެންގޮސްފައެވެ. މީގެ ތެރޭގައި ގިނައީ ބަންގްލަދޭޝް ރައްޔިތުންނެވެ. އަންނަ އަހަރުގެ މެއި މަހުގެ ނިޔަލަށް މި އޮޕަރޭޝަން އެއްކޮށް ނިންމާލުމަށް ސަރުކާރުން އަމާޒު ހިފާފައިވާއިރު، އޭރުން ބިދޭސީންގެ އާބާދީ ފުރިހަމައަށް ކޮންޓްރޯލް ކުރެވޭނެކަމަށް ވަޒީރު ވިދާޅުވިއެވެ.
މީގެ އިތުރުން، ރާއްޖެއަށް މަސްތުވާތަކެތި އެތެރެކުރުން ހުއްޓުވުމަށް ސަރުކާރުން އަޅަމުންދާ ހަރުދަނާ ފިޔަވަޅުތަކަށް ވެސް ވަޒީރު ވަނީ އަލިއަޅުއްވާލައްވާފައެވެ. ވެލާނާ އިންޓަރނޭޝަނަލް އެއަރޕޯޓާއި ގަމުގެ އިންޓަރނޭޝަނަލް އެއަރޕޯޓުގެ ބޯޑަރު ސެކިއުރިޓީ ވަރުގަދަކޮށް، ބޮޑީ ސްކޭނަރުގެ އެހީގައި މިހާރު ދަނީ ކާމިޔާބު މަސައްކަތްތަކެއް ކުރަމުންނެވެ. އެގޮތުން، ހަށިގަނޑުގައި ފޮރުވައިގެން މަސްތުވާތަކެތި އެތެރެކުރަން އުޅުނު ނޭޕާލްގެ ދެ ރައްޔިތަކު އިއްޔެ ވަނީ އަތުލައިގަނެފައެވެ.
ވަޒީރު އިޙުސާން ވިދާޅުވި ގޮތުގައި، މިފަދަ މައްސަލަތައް ހުއްޓުވުމަށްޓަކައި ޤާނޫނީ ގޮތުން ދެވޭ އަދަބުތައް މިހާރު ވަނީ ވަރަށް ބޮޑަށް ހަރުކަށިކޮށްފައެވެ. ކުރިން ޑީޕޯޓުކޮށްލުން ނުވަތަ ކުޑަ ޖަލު ހުކުމަކުން ސަލާމަތްވި ނަމަވެސް، ވަކި މިންވަރަކަށްވުރެ ގިނައިން ޑްރަގްސް އެތެރެކުރާ ފަރާތްތަކަށް މަރުގެ އަދަބު ދެވޭގޮތަށް ކަނޑައެޅުމަކީ، މަސްތުވާތަކެއްޗާ ދެކޮޅަށް ރާއްޖެއިން ގެންގުޅޭ ހަރުކަށި ސިޔާސަތު ރަމްޒުކޮށްދޭ މުހިންމު ފިޔަވަޅެއްކަން އެމަނިކުފާނު ފާހަގަކުރެއްވިއެވެ.
