މި އަހަރުގެ ކުރީކޮޅު ފެށި ދެކުނުގެ އަތޮޅުތައް ވައިގެމަގުން ގުޅާލުމުގެ މަޝްރޫޢަށް ލިބުނު ބޮޑު ކާމިޔާބީއާ އެކު، ރައްޔިތުންގެ ދަތުރުފަތުރަށް އިތުރު ލުއިފަސޭހަތަކެއް ހޯދައިދިނުމުގެ ބޭނުމުގައި، އުތުރުގެ ތިން އަތޮޅެއް ވައިގެ ނެޓްވޯކަކުން ގުޅާލުމުގެ އަމަލީ މަސައްކަތް ފަށައިފިއެވެ.
ޕީއެސްއެމް ނިއުސްގެ ޕްރޮގްރާމެއްގައި ވާހަކަދައްކަވަމުން އައިލެންޑް އޭވިއޭޝަންގެ މެނޭޖިންގ ޑިރެކްޓަރ އިބްރާހީމް އިޔާސް ހާމަކުރެއްވި ގޮތުގައި، އަލަށް ފެށި މަސައްކަތުގެ އަމާޒަކީ މިއަހަރުގެ ނިޔަލަށް ހއ، ހދ، އަދި ށ. އަތޮޅުގެ ވައިގެ ބަނދަރުތައް އެއް ވިއުގައަކުން ގުޅާލުމެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާއްސަ އިސްނެންގެވުމަކަށް ފެބްރުއަރީ މަހުގެ 1ވަނަ ދުވަހު ފެށި ދެކުނުގެ ވައިގެ ދަތުރުތަކަށް ބޮޑު ތަރުހީބެއް ލިބެމުންދާކަން ފާހަގަކުރައްވައި، އިޔާސް ވިދާޅުވީ އެ ދަތުރުތަކުގެ ލޯޑު ފެކްޓަރ މިހާރު ވެސް ހުރީ 70 އިންސައްތައަށްވުރެ މަތީގައި ކަމަށެވެ.
މިހާތަނަށް 2900 އަށްވުރެ ގިނަ މީހުން ޚިދުމަތް ހޯދާފައިވާ ދެކުނުގެ އުދުހުންތަކުގައި ބޭނުންކުރަމުން އަންނަނީ 15 މީހުންގެ ޖާގައިގެ ޓްވިންއޮޓާ ބޯޓުތަކެކެވެ. ކޮންމެ ދުވަހަކު އައްޑޫ ސިޓީގެ ގަމުން ފުވައްމުލަކަށް އަދި އެއަށްފަހު ގއ. ކޫއްޑޫ ނުވަތަ ގދ. ކާޑެއްދޫއަށް މި ފްލައިޓްތައް ދަތުރުކުރެއެވެ. ބައިނަލްއަޤްވާމީ ދަތުރުވެރިންނަށް ފަހިކޮށްދިނުމުގެ ގޮތުން، ގަމަށް އަންނަ ސްރީލަންކަން އެއަރލައިންސްގެ ޝެޑިއުލްތަކާ ދިމާކޮށް ބައެއް ދުވަސްދުވަހު އިތުރު ދަތުރުތައް ވެސް ބާއްވަމުން ގެންދާކަމަށް މެނޭޖިންގ ޑިރެކްޓަރ ވިދާޅުވިއެވެ.
ރައްޔިތުންނަށް ފަސޭހައިން ދަތުރުކުރެވޭނެ ހަރުދަނާ ނިޒާމެއް ވައިގެމަގުންނާއި ކަނޑުމަގުން ޤާއިމުކުރުމަކީ މި ސަރުކާރުގެ ވަރަށް ބޮޑު އަމާޒެކެވެ. އެތެރޭގެ އުދުހުންތައް ފުޅާކުރުމުގެ އިތުރުން، ބޭރުގެ ގިނަ މަންޒިލްތަކަކަށް ޤައުމީ އެއަރލައިންގެ ދަތުރުތައް ފެށުމަށްޓަކައި ރައީސް ވެވަޑައިގެންފައިވާ ވަޢުދުފުޅާ އެއްގޮތަށް، މޯލްޑިވިއަންގެ ފްލީޓަށް ވައިޑް ބޮޑީ އެއަރކްރާފްޓެއް ގެނައުމުގެ މަސައްކަތް ވެސް ސަރުކާރުން އަންނަނީ ބާރަށް ކުރިއަށް ގެންދަމުންނެވެ.
