ޚިދުމަތުގެ ފެންވަރު ރަނގަޅުކުރުމުގެ ބޭނުމުގައި ޤައުމީ އެއަރލައިން, މޯލްޑިވިއަން އިން އޭޓީއާރު މަރުކާގެ އިތުރު ދެ މަތިންދާބޯޓު ގެންނަން ނިންމައިފިއެވެ.
ދައުލަތުގެ މީޑިއާއަށް މަޢުލޫމާތު ދެއްވަމުން އައިލެންޑް އޭވިއޭޝަންގެ މެނޭޖިންގ ޑިރެކްޓަރ އިބްރާހީމް އިޔާސް ވިދާޅުވީ، އަލަށް އޯޑަރުދިން ދެ ބޯޓުގެ ތެރެއިން ފުރަތަމަ ބޯޓު މިއަހަރުގެ ފަހުކޮޅު ރާއްޖެއަށް ގެނެވޭނެ ކަމަށެވެ. އަދި ދެވަނަ ބޯޓު ގެނައުމަށް ތާވަލުކުރެވިފައި ވަނީ އަންނަ އަހަރުގެ ފަހުކޮޅަށް ކަމުގައި އޭނާ ހާމަކުރެއްވިއެވެ. އިޔާސް ފާހަގަކުރެއްވި ގޮތުގައި، މި އުޅަނދުތައް ގެނެވުމާއެކު ކުންފުނީގެ ފްލީޓް އައުކުރުމަށް ކުރިއަށްގެންދާ ބޮޑު މަޝްރޫޢުއަށް ވަރަށް ބޮޑު ކުރިއެރުމެއް ލިބިގެންދާނެއެވެ.
މޯލްޑިވިއަން އިން މިހާރު ބޭނުންކުރަމުންދާ ޑޭޝް-8 މަރުކާގެ ބޯޓުތަކަކީ 25 އަހަރަށްވުރެ ގިނަ ދުވަސްވެފައިވާ، އަދި އުފެއްދުން ވެސް ހުއްޓާލާފައިވާ އުޅަނދުތަކަކަށް ވުމާ އެކު، މެއިންޓެނެންސް ޚަރަދު އިންތިހާއަށް ބޮޑުކަމަށް އިޔާސް ވިދާޅުވިއެވެ. އެހެންކަމުން، 2008ވަނަ އަހަރުން ފެށިގެން ޚިދުމަތްދެމުން އަންނަ މި ބޯޓުތަކުގެ ބަދަލުގައި، ޒަމާނީ އޭޓީއާރު ބޯޓުތައް ހޯދުމުގެ މަސައްކަތް އެ ކުންފުނިން ފަށާފައި ވަނީ 2022ވަނަ އަހަރުގައެވެ.
ޖުމްލަ 27 މަތިންދާބޯޓު ހިމެނޭ މޯލްޑިވިއަންގެ ފްލީޓުގައި މިހާރު ވެސް އޭޓީއާރު މަރުކާގެ މުޅިން އައު 5 ބޯޓު ދަނީ ބޭނުންކުރަމުންނެވެ. މީގެ އިތުރުން ދެން އޮޕަރޭޝަންގައި އުޅެނީ ވައިޑް-ބޮޑީ އެއަރބަސް އޭ330 އަކާއި ނެރޯ-ބޮޑީ އޭ320 ބޯޓެއްގެ އިތުރުން، ޑޭޝް-8 ގެ 9 ބޯޓާއި ޓްވިންއޮޓާރ ޑޭޝް-6 ގެ 11 ބޯޓެވެ.
އެތެރޭގެ އުދުހުންތަކުގެ އިތުރުން ބައިނަލްއަޤްވާމީ ދަތުރުތައް ފުޅާކުރުމަކީ ވެސް ސަރުކާރުގެ ވަރަށް ބޮޑު އަމާޒެކެވެ. އެގޮތުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތްވާ ގޮތުގެ މަތިން، ބައިނަލްއަޤްވާމީ މަންޒިލްތަކަށް އުދުހުމަށްޓަކައި އިތުރު ވައިޑް-ބޮޑީ ބޯޓެއް މިއަހަރުގެ ފަހުކޮޅު ގެނައުމުގެ މަސައްކަތްވެސް ސަރުކާރާ ގުޅިގެން ކުރަމުންދާކަމަށް މޯލްޑިވިއަން އިން ވަނީ ހާމަކޮށްފައެވެ.
