ތުއްތު ކުއްޖަކު ޓެކްސީ އަށް ހޮޑުލުމުން ފައިސާ ނެގީ ދެ ފަރާތުން އެއްބަސްވި އަގަށް ކަމަށް ނަލަ އެ ޓެކްސީ އޮޕަރޭޓްކުރި ނަލަ ޓެކްސީއިން ބުނެފިއެވެ.
ތުއްތު ކުއްޖާގެ މަންމަ ބުނީ ހޮޑުލުމުން ޓެކްސީ ސާފުކުރަން ކަމަށް ބުނެ 1500ރުފިޔާ ދިނުމަށް އެދި ޑްރައިވަރު ފުރަތަމަ ޑިމާންޑްކުރި ކަމަށެވެ. ނަމަވެސް ފަހުން އަގު ކުޑަކޮށް ނެގީ 1000ރުފިޔާ ކަމަށް ވެސް ބެލެނިވެރިޔާ ބުންޏެވެ.
އެ މައްސަލައިގައި ޓެކްސީ ޑްރައިވަރަށާއި ޓެކްސީ ސެންޓަރަށް ފާޑުކިޔުންތައް އަމާޒުވެފައި ވަނިކޮށް ޓެކްސީ ސެންޓަރުން ފަހުން ވަނީ ބަޔާނެއް ނެރެފައެވެ.
ނަލަ ޓެކްސީއިން ބުނީ ކަސްޓަމަރު ގަޑިއަށް އޭނާ ދާން ބޭނުންވި ތަނަށް ގެންގޮސްދިން ކަމަށާއި އަދި ކާރު ސާފުކުރަން ފުރަތަމަ ދިޔައީ ވެސް ކަސްޓަމަރު ގުޅައިގެން 1500ރުފިޔާއަށް ހޯދި ތަނަކަށް ކަމަށެވެ.
ނަމަވެސް ކަސްޓަމަރު ބުނި ތަނުން ހިދުމަތް ނުލިބިގެން ޖެހިގެން ދިޔަ ތަނަށް ދިޔައިރު އަގު ހުރީ 1600އަށް ކަމަށާއި އަދި އެ ތަނާ ވާހަކަ ދައްކައިގެން 1000ރުފިޔާއަށް އަގު ކުޑަކޮށްދިނުމުން ކަަސްޓަމަރާ ވާހަކަ ދައްކައި އެއްބަސްވެގެން 1000ރުފިޔާ ނެގީ ކަމަށް ވެސް ބުންޏެވެ.
އަދި ސާފުކުރަން ދިޔަ މަންޒަރު ފެންނަ ފޮޓޯ ވެސް ކަސްޓަމަރާ ހިއްސާކުރި ކަމަށާއި އަދި ކާރު ސާފުކުރުމަށް ދިޔަ ހަރަދު ލިބުނުއިރު ޓެކްސީ ދަތުރުގެ ހަރަދުވެސް ނުލިބޭކަމަށް ނަލަ ޓެކްސީއިން ބުންޏެވެ.
އެހެންވެ ދެ ފަރާތުން އެއްބަސްވެގެން ކަންކަން ކުރުމަށް ޓެކްސީ ޑްރައިވަރާއި ޓެކްސީ ސެންޓަރުގެ އަގު ވެއްޓޭ ގޮތަށް ކަންކަން ކުރުމުން ކަންބޮޑުވާކަމަށް ނަލަ ޓެކްސީއިން ބުންޏެވެ.
