ވޯލްޑް ބޭންކުގެ އެހީތެރިކަމާ އެކު މޯލްޑިވްސް މެރިން ރިސާރޗް އިންސްޓިޓިއުޓާއި މަސްވެރިކަމާ ބެހޭ ވުޒާރާއިން ކ. މަނިޔަފުށީގައި ހިންގާ “މެރިން ހެޗަރީ ސްކިލްސް ޑިވެލޮޕްމަންޓް ޕްރޮގްރާމް”ގެ މިއަހަރުގެ ހަތަރުވަނަ ކޯހުގައި ބައިވެރިވުމަށް އާންމުކޮށް ހުޅުވާލައިފިއެވެ.
މި ހިނގާ އޮކްޓޯބަރު މަހުގެ 31އިން ފެށިގެން ނޮވެމްބަރު މަހުގެ 12ވަނަ ދުވަހުގެ ނިޔަލަށް ކުރިއަށްގެންދިއުމަށް ތާވަލުކޮށްފައިވާ މި ޕްރޮގްރާމުން ޖާގަ ދިނުމަށް ހަމަޖެހިފައި ވަނީ 15 ބައިވެރިންނަށެވެ. ކޯހަށް އެދި ހުށަހަޅާ ފަރާތްތަކުގެ އަދަދު ކަނޑައެޅިފައިވާ ޖާގައަށްވުރެ އިތުރުވެއްޖެނަމަ، ބައިވެރިންނަށް ފުރުޞަތު ދިނުމުގައި ބަލާނީ ފޯމު ހުށަހަޅާ ތަރުތީބަށެވެ. ޓްރާންސްފޯމް ޕްރޮޖެކްޓްގެ ދަށުން ހިންގާ މި ކޯހުގައި ބައިވެރިވުމަށް ޝައުޤުވެރިވާ ފަރާތްތަކުން މި މަހުގެ 18ވަނަ ދުވަހުގެ މެންދުރުފަހު ދޭއްގެ ކުރިން، މުއްދަތު ހަމަނުވާ އައިޑީކާޑުގެ ކޮޕީއަކާ އެކު އެޕްލިކޭޝަން ފޯމު މޯލްޑިވްސް މެރިން ރިސާރޗް އިންސްޓިޓިއުޓަށް ނުވަތަ އެ އިދާރާގެ ރަސްމީ އީމެއިލަށް ފޮނުއްވުމަށް ވަނީ އަންގަވާފައެވެ.
ސާދަ ދުވަހުގެ މުއްދަތަށް މަނިޔަފުށީ ރިސާރޗް އެންޑް ޓްރެއިނިންގ ފެސިލިޓީގައި ހިންގާ މި ތަމްރީނުތަކުގައި މައިގަނޑު ގޮތެއްގައި ކިޔަވައިދޭނީ އެކުއަކަލްޗަރގެ އުޞޫލުތަކާއި ނިޒާމުތަކުގެ މައްޗަށެވެ. އެގޮތުން ފާނައާއި ހުއިފިލަނޑާ އަދި މާގަނޑުމަސް ފަދަ ދިރުންތައް ވިއްސައިގެން ބޮޑުކުރާނެ ގޮތުގެ ޢަމަލީ ތަޖުރިބާ ބައިވެރިންނަށް ލިބިގެންދާނެއެވެ. މީގެ އިތުރުން އިތާމުތް އާލާކުރުމާއި، ދިރޭކާނާ ތައްޔާރުކުރުމާއި، މޫދުވިނަ ހެއްދުމުގެ އަސާސީ މަޢުލޫމާތު ފޯރުކޮށްދިނުމުގެ އިތުރުން، ބަލިތައް ދެނެގަނެ ރައްކާތެރިވާނެ ގޮތާއި ތިމާވެއްޓާ ރައްޓެހި ގޮތެއްގައި މި މަސައްކަތް ކުރާނެ ގޮތްތައް ވެސް މި ކޯހުގެ މުޤައްރަރުގައި ހިމެނެއެވެ.
މި ޕްރޮގްރާމުގައި ބައިވެރިވާ ފަރާތްތަކަށް ކޯސް ކުރިއަށްދާ ދުވަސްތަކުގައި މަނިޔަފުށީގައި ހުރެވޭނެ އިންތިޒާމު ހަމަޖައްސައިދޭނެއެވެ. އަދި ބައިވެރިންގެ ކެއިންބުއިމުގެ ޚަރަދުތަކާއި މާލެއާއި މަނިޔަފުއްޓާ ދެމެދު ކުރަންޖެހޭ ދަތުރުފަތުރުގެ ހުރިހާ އިންތިޒާމެއް ވެސް މޯލްޑިވްސް މެރިން ރިސާރޗް އިންސްޓިޓިއުޓްގެ ފަރާތުން ހަމަޖައްސައިދޭނެއެވެ.
