ހުޅުމާލޭގެ ތަރައްގީގެ ކަންކަން ބަލަހައްޓާ މައި ކުންފުނި، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ޑެޕިއުޓީ މެނޭޖިންގ ޑިރެކްޓަރަކަށް ހުންނެވި މުޙައްމަދު އަސްބާހް ޢަލީ ނަޞީރު، ސަރުކާރުގެ ފަރާތުން މިއަދު އެ މަގާމުން ދުރުކޮށްފިއެވެ.
ސަރުކާރުގެ ކަމާބެހޭ އިދާރާތަކުން ވަނީ، އެޗްޑީސީގެ އިސް ހިންގުންތެރިންގެ ތެރޭގައި ހިމެނިވަޑައިގަންނަވާ އަސްބާހް މަގާމުން ވަކިކުރެއްވިކަން ރަސްމީކޮށް ކަށަވަރުކޮށްދީފައެވެ. އޭނާ އެ ކޯޕަރޭޝަންގެ ޑީއެމްޑީގެ މަގާމަށް އައްޔަނުކުރައްވާފައި ވަނީ 3 އޮގަސްޓް 2025 ގައެވެ.
އަސްބާހުގެ އިތުރުން، ދައުލަތުގެ ބައެއް އެހެން އިދާރާތަކާއި ކުންފުނިތަކުގެ އިސް މަގާމުތަކުގައި ތިއްބެވި ބޭފުޅުންނަށް ވެސް މިއަދު ވަނީ ފިޔަވަޅު އަޅައިފައެވެ. މިގޮތުން، ރާއްޖޭގެ އެކި ކަންކޮޅުތަކުގައި ޚިދުމަތް ފޯރުކޮށްދޭ ފެނަކަ ކޯޕަރޭޝަންގެ މެނޭޖިންގ ޑިރެކްޓަރުގެ މަގާމުގައި ހުންނެވި ބޭފުޅާ ވެސް މިއަދު ވަނީ މަގާމުން ވަކިކުރައްވާފައެވެ.
