ގދ. ތިނަދޫ ސިޓީގެ ރައްޔިތުންނަށް ދިމާވެފައިވާ ގެދޮރުވެރިކަމުގެ ބޮޑު މައްސަލައަށް ދާއިމީ ހައްލެއް ހޯދައިދިނުމުގެ މަޤުޞަދުގައި، ސަރުކާރުން އެރަށުގައި މިހާރު ކުރިއަށްގެންދާ 250 ހައުސިންގ ޔުނިޓުގެ މަސައްކަތްތައް ހަލުވި ދުވެލީގައި ކުރިއަށްދާކަން ހާމަކޮށްފިއެވެ.
އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވުޒާރާއިން މަޢުލޫމާތު ދެއްވާ ގޮތުގައި، 2022ވަނަ އަހަރު ތިނަދޫގައި ބިނާކުރަން ފަށާފައިވާ ތިން ކޮޓަރީގެ ދުއިސައްތަ ރޯހައުސްއަށް އެދި 1022 މީހުން ފޯމު ހުށަހަޅާފައިވެއެވެ. މި ވަގުތު ކުރިއަށްދަނީ މި ފޯމުތައް ވަޒަންކުރުމުގެ މަރުޙަލާ ކަމަށާއި، މި މަސައްކަތް ނިމުނުހާ އަވަހަކަށް ޝަރުތު ހަމަވާ ފަރާތްތަކުގެ ލިސްޓު އިޢުލާނުކުރާނެކަމުގެ ޔަޤީންކަން އެ ވުޒާރާއިން ވަނީ ދީފައެވެ. އަދި މި ރޯހައުސްތަކުގެ ޢަމަލީ މަސައްކަތްތައް އަދިވެސް މެދުކެނޑުމެއްނެތި ކުރިއަށްދާކަން އެ ވުޒާރާއިން ފާހަގަކުރެއެވެ.
މީގެ އިތުރުން، މިދިޔަ މާރިޗު މަހުގެ 23ވަނަ ދުވަހު ވަނީ އިތުރު 50 ހައުސިންގ ޔުނިޓެއް ބިނާކުރުމުގެ ޢަމަލީ މަސައްކަތް ވެސް އެ ސިޓީގައި ފަށާފައެވެ. ސްވިފްޓް އިންޖިނިއަރިންގ ޕްރައިވެޓް ލިމިޓެޑާ ޙަވާލުކޮށްގެން ކޮންޓްރެކްޓަރ ފައިނޭންސް އުސޫލުން ކުރިއަށްގެންދާ މި މަޝްރޫޢުގެ ދަށުން ވެސް އިމާރާތްކުރަނީ ތިން ކޮޓަރީގެ ޔުނިޓުތަކެކެވެ. ސަރުކާރުން ދެކޭގޮތުގައި އަލަށް ފެށި މި ފަންސާސް ޔުނިޓުގެ މަސައްކަތް އެއްކޮށް ނިމުމުން، ރަށުގެ ރައްޔިތުންނަށް އިންތިހާއަށް ލުއިފަސޭހަތަކެއް ލިބިގެންދާނެއެވެ.
ރާއްޖޭގެ އެކި ކަންކޮޅުތަކުގައި ބޯހިޔާވަހިކަމުގެ ގިނަ މަޝްރޫޢުތަކެއް ހިންގަމުންދާއިރު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ތަރައްޤީގެ އެންމެ އިސް ސިޔާސަތަކީ ގެދޮރުވެރިކަން ކަމުގައި ކަނޑައަޅުއްވާފައެވެ. އަދި އާބާދީއާއި ބިމުގެ ގޮތުން ހުވަދުއަތޮޅުގެ އެންމެ ބޮޑު ރަށް ކަމަށްވާ ތިނަދޫ ސިޓީ ހިމެނޭހެން، މުޅި އެ އަތޮޅަކީ ދައުލަތުގެ ޕްލޭންގެ ދަށުން އެންމެ ގިނަ އަދަދަކަށް ފްލެޓާއި ހައުސިންގ ޔުނިޓުތައް ތަރައްޤީކުރެވޭނެ އެއް ސަރަޙައްދުކަމަށް އެމަނިކުފާނު ވަނީ އިޢުލާނުކުރައްވާފައެވެ.
