ރައްޔިތުންގެ ކަންބޮޑުވުންތަކަށް ސީދާ ހައްލު ހޯއްދަވައިދެއްވުމުގެ މަގުސަދުގައި، އާންމު ފަރުދުންނަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާ ވަކިން ބައްދަލުކުރެވޭނެ އިންތިޒާމުތައް ވަރަށް އަވަހަށް ހަމަޖައްސަވާނެކަން އެމަނިކުފާނު އިޢުލާންކުރައްވައިފިއެވެ.
“ނޭޝަން ޗެޓް” ޕޮޑްކާސްޓުގައި ވާހަކަފުޅު ދައްކަވަމުން މިކަމާ ގުޅޭގޮތުން ތަފްސީލު ދެއްވަމުން ރައީސް ވިދާޅުވީ، ސަރުކާރުން މިހާރު ރާއްވަވަމުން ގެންދަ ވަނީ ކޮންމެ ހަފުތާއެއްގެ ވެސް ކަނޑައެޅޭ ވަކި ދުވަސްތަކެއްގައި އާންމުންނާ ބައްދަލުކުރެއްވުމަށް ކަމަށެވެ. އެގޮތުން ރާއްޖޭގެ ހުރިހާ ދާއިރާތަކެއް ހިމެނޭހެން، ކޮންމެ ދާއިރާއަކުން ވެސް ގާތްގަނޑަކަށް ފަނަރަވަރަކަށް އާއިލާއަށް ނުވަތަ ފަރުދުންނަށް އެމަނިކުފާނާ ބައްދަލުކޮށް ޝަކުވާތައް ހުށަހެޅުމުގެ ފުރުސަތު ފަހިކޮށްދެއްވުމަކީ އަމާޒެއްކަމުގައި ވިދާޅުވިއެވެ.
ރައީސްގެ ރަސްމީ މަސައްކަތްޕުޅުތަކާއި ދަތުރުފުޅުތައް ހުންނަ ގޮތުން މުޅި ރާއްޖޭގެ ހުރިހާ ދާއިރާއެއް ކަވަރުކުރުމަށް އަހަރެއްހާ ދުވަސް ހޭދަވުމަކީ އެކަށީގެންވާ ކަމެއް ނަމަވެސް، މިއީ ގިނަ ބަޔަކަށް އެމީހުންގެ އަޑު ސީދާ ރައީސާ ހަމައަށް ފޯރުކޮށްދިނުމަށް ލިބިގެންދާނެ ރަނުގެ ފުރުސަތެއްކަން އެމަނިކުފާނު ފާހަގަކުރެއްވިއެވެ.
މީގެކުރިން މާލޭގެ އެކި ސަރަޙައްދުތަކުގައި ބޭއްވި އަވަށު ބައްދަލުވުންތަކުގެ ތެރެއިން ވެސް، ރައީސާ ވަކިން ބައްދަލުކުރުމަށް ގިނަ ރައްޔިތުންތަކެއް އެދިފައިވާކަން އެމަނިކުފާނު ހާމަކުރެއްވިއެވެ. އަދި އެފަދަ ބައްދަލުވުންތަކުގައި ހުށަހެޅުނު މައްސަލަތަކުގެ ތެރެއިން އެކަށީގެންވާ ޖަވާބެއް ނުލިބި ނުވަތަ ހައްލެއް ނުލިބި ހުރި ކަންކަން ސީދާ އެމަނިކުފާނުގެ ސަމާލުކަމަށް ގެނެސްދެއްވުމަށް ވެސް ރައީސް ވަނީ އާންމުންގެ ކިބައިން އެދިވަޑައިގެންފައެވެ.
އާންމުންގެ ފަރާތުން އެންމެ ގިނައިން ލިބެމުންދާ ޝަކުވާއަކީ ބޯހިޔާވަހިކަމާ ގުޅުންހުރި މައްސަލަތައްކަން ފާހަގަކުރައްވައި ރައީސް ވިދާޅުވީ، ފްލެޓްތަކާ ގުޅިގެން އައިސްފައިވާ ޝަކުވާތައް ބަލައި، ޕޮއިންޓް ދީފައިވާ ގޮތުގެ ސައްހަކަން ކަށަވަރުކުރުމަށް ފަހު އެކަންކަމަށް ޖަވާބުދާރީވެވަޑައިގެންފައިވާނެ ކަމަށެވެ. މީގެ އިތުރުން، ރައްޔިތުންގެ ކަންބޮޑުވުންތައް ސަރުކާރުން ނަގަނީ ވަރަށް ސީރިއަސްކޮށް ކަމަށާއި، އެ ކަންކަމަށް އަވަސް ހައްލުތަކެއް ހޯއްދަވައިދެއްވުމަށް މެދުކެނޑުމެއްނެތި މަސައްކަތްކުރައްވަމުން ގެންދަވާކަމުގެ ޔަގީންކަން ވެސް ރައީސް ދެއްވިއެވެ.
