ރާއްޖޭގައި ޤަވާއިދާ ޚިލާފަށް ދިރިއުޅެމުންދާ ބިދޭސީން ހޯދައި ފިޔަވަޅު އެޅުމަށް މޯލްޑިވްސް އިމިގްރޭޝަނުން ފަށާފައިވާ ޚާއްޞަ ހަރަކާތްތަކުގެ ތެރެއިން، ހުޅުމާލެ ދެވަނަ ފިޔަވަހީގައި ހިންގި އިންސްޕެކްޝަނެއްގައި 8 ބިދޭސީއަކު މިއަދު އެ އިދާރާގެ ބެލުމުގެ ދަށަށް ގެންގޮސްފިއެވެ.
މައިގްރޭޝަން މޮނިޓަރިންގ އެންޑް ކޮމްޕްލަޔަންސް ޕްރޮގްރާމް (އެމްއެމްސީޕީ) ގެ ނަމުގައި އިމިގްރޭޝަނުން ކުރިއަށްގެންދާ މި އޮޕަރޭޝަންގެ ދަށުން ހުޅުމާލެ ފޭސް 2 ސަރަޙައްދުގައި ޖުމްލަ 19 ބިދޭސީއެއްގެ ލިޔެކިޔުންތައް ވަނީ ބަލައި ފާސްކޮށްފައެވެ. އޭގެ ތެރެއިން ކަމާބެހޭ ހުއްދަތައް ނެތި، ޤަވާއިދާ ޚިލާފަށް މަސައްކަތްކުރަމުންދިޔަ އަށް މީހަކު ވަނީ ވަގުތުން އިމިގްރޭޝަންގެ ބެލުމުގެ ދަށަށް ގެންގޮސްފައެވެ.
Monitoring activities under the Migration Monitoring & Compliance Program (MMCP) were conducted today in Hulhumalé phase 2. A total of 19 expats were checked, and 08 expats working illegally were detained. #MMCP #MaldivesImmigration pic.twitter.com/mpYUqHTKzT
— Maldives Immigration (@ImmigrationMV) April 27, 2026
ބިދޭސީންގެ މައްސަލަތަކާ ގުޅިގެން ޤައުމުގެ އިޤްތިޞާދަށާއި މުޖުތަމަޢަށް ކުރިމަތިވަމުންދާ ނޭދެވޭ އަސަރުތައް ކުޑަކުރުމަށްޓަކައި، ދިވެހި ސަރުކާރުން އަންނަނީ ހަރުދަނާ ފިޔަވަޅުތަކެއް އަޅަމުންނެވެ. މިގޮތުން، ދިވެހި ރައްޔިތުންގެ ނަންމަތީގައި ފަރުދާވެ ތިބެ ވިޔަފާރިކުރާ ބިދޭސީންނާއި، އެއްވެސް ހުއްދައެއް ނެތި އުޅޭ މީހުން ހޯދުމުގެ ފުޅާ ހަރަކާތްތަކެއް ކަމާބެހޭ އިދާރާތައް ގުޅިގެން ދަނީ ހިންގަމުންނެވެ.
މުޅި ރާއްޖޭގައި ކުރިއަށްގެންދާ ބިދޭސީންގެ މަޢުލޫމާތު އެއްކުރުމުގެ ބޮޑު ޕްރޮގްރާމްގެ ތެރެއިން މިހާތަނަށް 202،000 އަށްވުރެ ގިނަ މީހުންގެ ރެކޯޑުތައް ވަނީ ނަގާފައެވެ. އަދި ފުރިހަމަ މަޢުލޫމާތު ހިއްސާނުކުރާ ބިދޭސީން އަންނަ މަހުގެ ދެވަނަ ދުވަހުން ފެށިގެން އަނބުރާ ޤައުމަށް ފޮނުވާލުމުގެ މަސައްކަތް (ޑީޕޯޓްކުރުން) ފަށާނެކަމުގެ އިންޒާރު ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާބެހޭ ވުޒާރާއިން ވަނީ ދެއްވާފައެވެ.
