މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ދޫކޮށް އިތުރު ޕާޓީއެއް ހަދައިގެން ދިޔަކަމުގައިވީ ނަމަވެސް، އަބަދުވެސް އެމްޑީޕީއަށް ލޯބި އޮންނަ ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
އައްޑޫ ސިޓީގައި “ބޮޑު ބަދަލު”ގެ ނަމުގައި ބޭއްވި ޚާއްޞަ ޖަލްސާގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ، އެ މަނިކުފާނު އެނބުރި ޕާޓީއަށް ވަޑައިގަތީ، މީހަރު މި އޮތް ސަރުކާރު ޖަވާބުދާރީ ކުރުވުމަށާއި ކުރިއަށް އޮތް 2028ވަނަ އަހަރުގެ ރިޔާސީ އިންތިހާބުގައި އެމްޑީޕީގެ ޓިކެޓުގައި ވާދަކުރެއްވުމަށް ޕާޓީގެ މިހާރުގެ ޗެއާޕާސަން ފައްޔާޒް އިސްމާއީލަށް ތާއީދުކުރައްވާފައިވާތީ ކަމަށެވެ. އަދި އެމްޑީޕީއަކީ ރާއްޖޭގެ އިސްލާހީ މަސައްކަތްތަކަށް ވަރަށް ބޭނުންތެރި މުއައްސަސާއެއްކަމަށާއި، މިފަދަ މަސައްކަތެއް ހިންގޭނެ އެހެން އެއްވެސް މުއައްސަސާއެއް މިހާރު ރާއްޖޭގައި ނެތް ކަމަށް ވެސް ނަޝީދު ވިދާޅުވިއެވެ.
“އަޅުގަނޑަށް ވެސް އިނގޭ އަޅުގަނޑު އެމްޑީޕީދޫކޮށް ދިޔަކަން. އެހެންނަމަވެސް މިއަދު އަޅުގަނޑު އައިސް މި ހުރީ މި މުއައްސަސާއާ އެކީގަ މިކަން ކުރުމަށް. އަޅުގަނޑު އަބަދުވެސް ދެކެނީ މަސައްކަތް ކުރުމަށް އެންމެ ރަނގަޅު މުއައްސަސާއަކީ އެމްޑީޕީކަމަށް.” ކުރީގެ ރައީސް މުޙައްމަދު ނަޝީދު ވިދާޅުވިއެވެ.
އެމްޑީޕީގެ އެތެރޭގެ މައްސަލަތައް ދުވަހެއް ދުވަހަކަށް ދަނީ ހޫނު ވަމުންނެވެ. އެމްޑީޕީގެ އެތެރޭގެ އިންތިހާބުގައި ވަކި ކެންޑިޑޭޓަކަށް ތާއީދުކުރެއްވި ކަމަށް ބުނެ މީކާއީލް ނަސީމް ދެއްކެވި ވާހަކަތައް ކުރީގެ ފޮރިން މިނިސްޓަރު އަބްދުﷲ ޝާހިދު ވަނީ ދޮގުކުރައްވާފައެވެ. ހަމައެހެންމެ، ޕާޓީގެ އަސާސީ ގަވާއިދާ ހިލާފުވާކަމަށް ކަނޑައަޅައި، ޗެއާޕާސަން ނެރުއްވި އިއުލާނެއް ބާތިލުކުރުމަށް އެމްޑީޕީގެ އިސްތިއުނާފު މަޖިލީހުން ދާދިފަހުން ވަނީ އަންގާފައެވެ. މި ހުރިހާ ކަމަކުން ދައްކައިދެނީ އެމްޑީޕީގެ އެތެރޭގައި މިވަގުތު ހިނގަމުންދާ ސިޔާސީ އޮއިވަރުގެ ބާރުމިނާއި ޕާޓީގެ މިސްރާބު ބަދަލުވަމުންދާ ގޮތެވެ.
