ރިސޯޓުތަކަށް ލިބޭ ބޭރު ފައިސާގެ ތެރެއިން ވަކި އިންސައްތައެއް މާރުކުރަންޖެހޭ ގޮތަށް ހަދާފައިވާ އައު ގަވާއިދާ ގުޅިގެން ޓޫރިޒަމް ދާއިރާއާ މަޝްވަރާކޮށްފައިނުވާކަމަށް ބުނެ، ސަރުކާރުގެ އިސް ތަރުޖަމާނު މުހައްމަދު ހުސެއިން ޝަރީފަށް ނިސްބަތްކޮށް ‘ދައުރު’ ނޫހުން ގެނެސްދީފައި ވަނީ ކަނޑައެޅިގެން ހަގީގަތާ ހިލާފު ވާހަކަތަކެއްކަމަށް ރައީސުލްޖުމްހޫރިއްޔާގެ އޮފީހުން ހާމަކޮށްފިއެވެ.
އަހުމަދު ނާއިފް ލިޔެ، އެ ނޫހުގައި ޝާއިއުކޮށްފައިވާ ރިޕޯޓެއްގައި ތުހުމަތުކޮށްފައިވާ ގޮތުން، ޓޫރިޒަމް ސިނާއަތުން ލިބޭ އާމްދަނީގެ 40 އިންސައްތަ މާރުކުރަން ނިންމީ މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)އާ އެއްވެސް މަޝްވަރާއެއް ކުރުމަކާ ނުލައެވެ. އަދި އެއީ އެ ޖަމިއްޔާއަށް ލިބުނު ކުއްލި ސިހުމެއްކަމަށާއި، މި ބަދަލުގެ ސަބަބުން ވިޔަފާރިވެރިންގެ މެދުގައި ނުތަނަވަސްކަން އުފެދިފައިވާކަމަށް އެ ހަބަރުގައި ބަޔާންކޮށްފައިވެއެވެ. ނަމަވެސް ރައީސް އޮފީހުން ވަނީ މިއީ ސަރުކާރުގެ ތަރުޖަމާނަށް އަމާޒުކޮށް ފަތުރާފައިވާ “ދޮގެއް” ކަމަށް ސިފަކޮށްފައެވެ.
މި ތުހުމަތުތައް ދޮގުކުރައްވައި ރައީސް އޮފީހުން ނެރުނު ބަޔާނުގައި ފާހަގަކޮށްފައިވާ ގޮތުގައި، ބޭރު ފައިސާއާ ބެހޭ ގާނޫނަށް ގެނައި އިސްލާހުތަކާ ގުޅޭގޮތުން ސަރުކާރުން ވަނީ އެތައް ފަހަރެއްގެ މަތިން މަޓީއާއި އެ ޖަމިއްޔާގެ އިސްވެރިންނާ އެކު ބައްދަލުވުންތައް ބާއްވައިފައެވެ. އެގޮތުން، މިދިޔަ އޮގަސްޓު މަހުގެ 23ވަނަ ދުވަހު ރައީސް އޮފީހުގައި ބޭއްވި ހާއްސަ ބައްދަލުވުމަކީ އޭގެ އެއް ހެއްކެވެ.
އެ ބައްދަލުވުމުގައި ސަރުކާރުގެ ފަރާތުން ފިނޭންސް މިނިސްޓަރު ހަސަން ޒަރީރާއި، ހޯމްލޭންޑް ސެކިއުރިޓީ މިނިސްޓަރު އަލީ އިހުސާނާއި، އިކޮނޮމިކް މިނިސްޓަރު މުހައްމަދު ސައީދުގެ އިތުރުން ޓޫރިޒަމް މިނިސްޓަރު މުހައްމަދު އަމީނާއި ބަންޑާރަނައިބު އަހުމަދު އުޝާމް އަދި އެމްއެމްއޭގެ ގަވަރުނަރު އަހުމަދު މުނައްވަރު ބައިވެރިވެވަޑައިގެންނެވިއެވެ. ހަމައެއާ އެކު، މަޓީގެ ވައިސް ޗެއާމަނާއި، ސެކްރެޓަރީ ޖެނެރަލް އަދި ޑެޕިއުޓީ ސެކްރެޓަރީ ޖެނެރަލް ހިމެނޭހެން ޖުމުލަ ހަ މަންދޫބަކު އެ ޖަމިއްޔާ ތަމްސީލުކުރެއްވިކަމަށް ސަރުކާރުން ހާމަކުރެއެވެ. މީގެ އިތުރުން، އޮގަސްޓު 24ގައި މަޓީން ނެރުނު ނޫސްބަޔާނަކީ ވެސް މި މަޝްވަރާތައް ހިނގިކަމުގެ ސާފު ހެއްކެއްކަމަށް ސަރުކާރުން ބުނެފައިވެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އޮގަސްޓު 31ގައި ތަސްދީގުކުރެއްވި ބޭރު ފައިސާއާ ބެހޭ ގާނޫނުގެ ފުރަތަމަ އިސްލާހުގެ ދަށުން، ‘ކެޓެގަރީ އޭ’ގައި ހިމެނޭ ފަތުރުވެރިކަމުގެ ހިދުމަތްދޭ ތަންތަނުން މަހެއްގެ މައްޗަށް ލިބޭ ޖުމުލަ އާމްދަނީގެ 40 އިންސައްތަ މާރުކުރަންޖެހެއެވެ. މީގެ ކުރިން އޮންނަ، ފަތުރުވެރިއެއްގެ ބޮލަކަށް 500 ޑޮލަރު މާރުކުރަންޖެހޭ އުސޫލު މިހާރު ވަނީ އުވާލައިފައެވެ. އަދި ‘ކެޓެގަރީ ބީ’ގައި ހިމެނޭ ތަންތަނުން ފަތުރުވެރިއަކަށް 25 ޑޮލަރު ނުވަތަ ޖުމުލަ އާމްދަނީގެ 20 އިންސައްތަ މާރުކުރުމަށް މި ގާނޫނު ލާޒިމުކުރެއެވެ. މިފަދަ ބޮޑު ބަދަލެއް ގެނައީ ކުއްލިއަކަށް ކަމަށް ބުނެ ސަރުކާރުގެ ތަރުޖަމާނަށް އަމާޒުކޮށް ދައްކާފައިވާ ވާހަކަތަކަކީ އަސާސެއް ނެތް ދޮގުތަކެއްކަން ރައީސް އޮފީހުގެ ބަޔާނުގައި ވަނީ ކަށަވަރުކޮށްދީފައެވެ.
