ދިވެހިރާއްޖޭގެ ސިއްހީ އަދި އިޖުތިމާއީ ދާއިރާ އިތުރަށް ހަރުދަނާކޮށް ކުރިއެރުވުމަށްޓަކައި، ޗައިނާ ސަރުކާރުގެ ފަރާތުން ފުރިހަމަ އެހީތެރިކަމާއި އެއްބާރުލުން ދެއްވާނެކަމުގެ ޔަގީންކަން، ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ކޮންގް ޝިއަންހުއާ، ސިއްޙަތާއި ޢާއިލާއާއި އިޖުތިމާއީ އެހީއާ ބެހޭ ވަޒީރު ގީލާ އަލީއަށް މިއަދު އަރުވައިފިއެވެ.
މިކަން ހާމަކޮށްފައި ވަނީ، ސިއްހީ އަދި އިޖުތިމާއީ ކަންކަމާ ގުޅޭގޮތުން މަޝްވަރާކުރެއްވުމަށް މި ދެ ބޭފުޅުން ބޭއްވެވި ހާއްސަ ބައްދަލުކުރެއްވުމުގެ ތެރެއިންނެވެ. މި ބައްދަލުވުމުގައި ވާހަކަފުޅުދައްކަވަމުން ސަފީރު ވަނީ، މިހާރު ވިލިމާލޭގައި ކުރިއަށްދާ ޗައިނާ-މޯލްޑިވްސް ފްރެންޑްޝިޕް ހޮސްޕިޓަލް ބިނާކުރުމުގެ ބޮޑު މަޝްރޫއުގެ އިތުރުން، އެހެނިހެން މުހިންމު ތަރައްގީގެ މަސައްކަތްތަކުގެ ސަބަބުން ދެ ގައުމުގެ ގުޅުން އިތުރު ހަރުފަތަކަށް ގޮސްފައިވާކަން ފާހަގަކުރައްވާފައެވެ.
Minister @geelaali received a courtesy call from Kong Xianhua @China_Amb_Mdv . Discussions focused on strengthening Maldives–China cooperation in the health and social sectors, including collaboration opportunities. Minister appreciated China’s continued support and partnership. pic.twitter.com/ZzYwxBCDKm
— Ministry of Health, Family and Welfare (@MoHmv) June 10, 2026
އޭގެ އިތުރުން، މި ދެ ދާއިރާއަށް ބޭނުންވާ ފަންނީ މީހުން ބިނާކޮށް ތަމްރީނުކުރުމުގެ ފުރުސަތުތައް ފަހިކޮށްދިނުމާ ގުޅޭގޮތުން ވެސް ދެ ފަރާތުން ވަނީ ފުޅާ ދާއިރާއެއްގައި މަޝްވަރާކުރައްވާފައެވެ.
މި ބައްދަލުކުރެއްވުމުގައި ވަޒީރު ގީލާ ވަނީ، ރާއްޖޭގެ ތަރައްގީގެ މުހިންމު ބައިވެރިއެއްގެ ގޮތުގައި ޗައިނާއިން އަދާކުރާ އިސް ދައުރު ފާހަގަކުރައްވައި، އެ ގައުމުން ރާއްޖެއަށް ވެދެއްވަމުން ގެންދަވާ އަގުހުރި އެހީތެރިކަމަށްޓަކައި ޗައިނާ ސަރުކާރަށް ހާއްސަ ޝުކުރެއް އަދާކުރައްވާފައެވެ.
