ރާއްޖޭގެ ޤައުމީ ބޭންކް (ބީއެމްއެލް)އިން އެންމެ ކުޑަ އިންޓަރެސްޓް ރޭޓުގައި ދޫކުރާ “ލިވަބޯޑް ފައިނޭންސް”ގެ ނަމުގައި ޚާއްޞަ ލޯނު ސްކީމެއް މިއަދު ތަޢާރަފުކޮށްފިއެވެ.
އަހަރަކު 9.5 އިންސައްތައިގެ ރޭޓެއްގައި ދޫކުރާ މި ލޯނަކީ މިވަގުތު ރާއްޖޭގައި އުޅަނދުފަހަރަށް ޚާއްޞަކޮށްގެން ދޫކުރާ އެންމެ ކުޑަ ރޭޓެވެ. ބޭންކުން މަޢުލޫމާތު ދޭގޮތުގައި، މި ފައިސާ ބޭނުންކުރެވޭނީ އައު ސަފާރީ ގަތުމަށާއި، ބަނުމަށާއި، އިންޖީނު އެޅުމުގެ އިތުރުން މަރާމާތުކުރުމަށާއި ބޭނުންވާ އެހެނިހެން އާލާތްތައް ހޯދުމަށެވެ. އަދި މި ލޯނަށް އެހެން އިތުރު ރަހުނެއް ބަހައްޓަން ނުޖެހޭއިރު، ރަހުނެއްގެ ގޮތުގައި ބެލެވޭނީ ހަމައެކަނި ފައިނޭންސްކުރާ އުޅަނދެވެ.
ޑޮލަރުން އަނބުރާ ދައްކާ ގޮތަށް ހަމަޖެހިފައިވާ މި ފެސިލިޓީގެ މުއްދަތަކީ ހަތް އަހަރު ދުވަހެވެ. މި ލޯނުގެ އެންމެ ބޮޑު އެއް ފަސޭހައަކީ، އެއްވަރެއްގެ އިންސްޓޯލްމަންޓްތަކެއް މަހުން މަހަށް ދެއްކުމުގެ ބަދަލުގައި، ފަތުރުވެރިކަމުގެ ޕީކް ސީޒަނާއި އޮފް-ޕީކް ސީޒަނަށް ރިޢާޔަތްކޮށް ލިބޭ އާމްދަނީއާ ގުޅޭގޮތަށް ފައިސާ ދެއްކޭނެ އިންތިޒާމު ހަމަޖެހިފައި އޮތުމެވެ.
ބީއެމްއެލްގެ ސީއީއޯ އަދި މެނޭޖިންގ ޑައިރެކްޓަރ މުޙައްމަދު ޝަރީފް ފާހަގަކުރެއްވި ގޮތުގައި، ސަފާރީ ވިޔަފާރިއަކީ ރާއްޖޭގެ އިޤްތިޞާދަށް ނުހަނު މުހިންމު ދާއިރާއެކެވެ. އެހެންކަމުން މި ޚިދުމަތް ފަރުމާކޮށްފައި ވަނީ އެ ދާއިރާގެ ޚަރަދުތަކާއި އާމްދަނީ ލިބޭ ނިސްބަތަށް ވަރަށް ބޮޑަށް ބެލުމަށް ފަހު ކަމަށާއި، މީގެ ސަބަބުން މި ސިނާޢަތަށް އަލަށް ވަންނަ ފަރާތްތަކަށާއި ތަޖުރިބާކާރު އޮޕަރޭޓަރުންނަށް ވެސް އެމީހުންގެ ވިޔަފާރި ފުޅާކުރުމަށް ބޮޑު އެހީތެރިކަމެއް ލިބިގެންދާނެކަމަށް އޭނާ ވިދާޅުވިއެވެ.
