މިއަހަރުގެ މިނިވަން ދުވަހާ ގުޅުވައިގެން ޤައުމީ ދިފާއީ ބާރުން މިއަދު ބާއްވަން ރޭވި ޝަރަފުވެރި ޕެރޭޑު، ވިއްސާރަވުމުގެ ސަބަބުން ފަސްކުރުމަށް ފަހު، މި މަހުގެ 29 ވާ ބުރާސްފަތި ދުވަހު ހުޅުމާލޭގައި ބޭއްވުމަށް ނިންމަވައިފިއެވެ.
ދިފާއީ ބާރުން މަޢުލޫމާތު ދެއްވާ ގޮތުގައި، މި ޕެރޭޑު ފެށުމަށް ހަމަޖެހިފައި ވަނީ ބުރާސްފަތި ދުވަހުގެ ހަވީރު 4:30 ގައެވެ. އަދި މި ޕެރޭޑު ކުރިއަށްދާ ވަގުތު ހުޅުމާލޭގެ މުހިންމު ކަންމަތިތަކަށް މަޑުކޮށް، އާންމުންނަށް ޚާއްސަކޮށްގެން މިލިޓަރީ ބޭންޑުގެ ހިތްގައިމު ހުށަހެޅުންތަކެއް ދައްކާލުމަށް ވަނީ ރާވާފައެވެ.
ގައުމީ މިނިވަން ދުވަހުގެ މުނާސަބަތުގައި ރޭ ވެސް ވަނީ ދިފާއީ ބާރުގެ ގިނަ ޔުނިޓުތަކަކާއި 15 ސްކޫލެއްގެ ދަރިވަރުން ހިމެނޭހެން ކުލަގަދަ ހެވިކަމުގެ ހަރަކާތްތަކެއް ބާއްވާފައެވެ.
ރާއްޖޭގައި ފާހަގަކުރާ މިނިވަން ދުވަހުގެ އުފާފާޅުކުރުންތަކުގެ ތެރެއިން، ސިފައިންނާއި ދަރިވަރުން ގުޅިގެން ބާއްވާ ޕެރޭޑުތަކާއި ރޫޓް މާޗުތަކަކީ އަބަދުވެސް އާންމު ރައްޔިތުންގެ މެދުގައި އެންމެ މަގުބޫލު އެއް ހަރަކާތެވެ. އެގޮތުން، ކޮންމެ އަހަރަކު ވެސް މި މަންޒަރުތައް ބަލާލުމަށްޓަކައި ގިނަ އަދަދެއްގެ ކުޑަކުދިންނާއި ބޮޑެތި މީހުން މަގުމައްޗަށް ޖަމާވެއެވެ.
