ރާއްޖެއާއި އޮސްޓްރޭލިއާއާ ދެމެދު އޮތް ގުޅުން އިތުރަށް ހަރުދަނާކުރުމަށް މަޝްވަރާތަކެއް ބާއްވައިފިއެވެ.
ރާއްޖޭގެ 61 ވަނަ މިނިވަން ދުވަހުގެ މުނާސަބަތަށް އޮސްޓްރޭލިއާއިން އިންޑިއާ ކަނޑަށް ކަނޑައަޅުއްވާފައި ހުންނަވާ ޚާއްޞަ މަންދޫބު ޓިމް ވަޓްސް ރާއްޖެއަށް ކުރެއްވި ރަސްމީ ދަތުރުފުޅުގެ ތެރެއިން، ދެ ޤައުމުގެ ދެމެދުގައި ވިޔަފާރިއާއި އިޤްތިޞާދީ ދާއިރާއިން އެއްބާރުލުން އޮތް ގުޅުން ފުޅާކޮށް އިތުރުކުރުމަށް ޚާރިޖީ ވަޒީރު އިރުތިޝާމް އާދަމްއާ އެކު ބޭއްވުނު މަޝްވަރާތަކެކެވެ.
މި ބައްދަލުކުރެއްވުމުގައި، ދިވެހިރާއްޖެއާއި އޮސްޓްރޭލިއާއާ ދެމެދު އޮންނަ ޒަމާންވީ އެކުވެރިކަން އާ ހަރުފަތަކަށް ގެންދިއުމާމެދު ފުޅާ ދާއިރާއެއްގައި ވަނީ ޚިޔާލު ބަދަލުކުރައްވާފައެވެ. އެގޮތުން، ކަނޑުމަތީގެ ސަލާމަތާއި ރައްކާތެރިކަން ޤާއިމުކުރުމާއި، މޫސުމަށް އަންނަ ނޭދެވޭ ބަދަލުތަކާ ދެކޮޅަށް ގުޅިގެން މަސައްކަތްކުރުމުގެ އިތުރުން، ތަޢުލީމީ ގޮތުންނާއި ފަތުރުވެރިކަމުގެ ރޮނގުން ގުޅުން ބަދަހިކުރުމަށް ދެބޭފުޅުން ވަނީ ވާހަކަފުޅުދައްކަވާފައެވެ.
މި މަޝްވަރާތަކުގެ ތެރެއިން ޚާރިޖީ ވަޒީރު އިރުތިޝާމް ވަނީ، އޮސްޓްރޭލިއާ ސަރުކާރުގެ ފަރާތުން ރާއްޖެއަށް މެދުނުކެނޑި ލިބެމުންދާ އެހީތެރިކަމާއި އެއްބާރުލުން ފާހަގަކުރައްވައި ޝުކުރު އަދާކުރައްވާފައެވެ. އަދި ދެ ޤައުމަށް ފައިދާހުރި މުހިންމު ލަނޑުދަނޑިތަކެއް ޙާޞިލުކުރުމަށްޓަކައި ކުރިމަގުގައި ގުޅިގެން މަސައްކަތްކުރެއްވުމަށް އުންމީދުކުރައްވާކަމުގައި ވެސް އެކަމަނާ ވިދާޅުވިއެވެ.
ފަހުގެ ތާރީޚެއްގައި ދެ ޤައުމުގެ ގުޅުން ވަރަށް ބޮޑަށް ބަދަހިވެފައިވާއިރު، ކަނޑުގެ ސަލާމަތްތެރިކަން ކަށަވަރުކުރުމަށް އޮސްޓްރޭލިއާއިން ވަނީ މި އަހަރުގެ ޖޫން މަހު ރާއްޖެއަށް އަސްކަރީ މަނަވަރެއް ހިލޭ އެހީގެ ގޮތުގައި ހަދިޔާކޮށްފައެވެ. އޭގެ ކުރިން މެއި މަހުގެ ތެރޭގައި ވަނީ ކަނޑުދަތުރުފަތުރުގެ ރައްކާތެރިކަމާ ގުޅޭ ޚާއްޞަ ފަހުމުނާމާއެއްގައި ދެ ޤައުމުން ސޮއިކޮށްފައެވެ.
މީގެ އިތުރުން، ޤައުމީ އެއަރލައިން ‘މޯލްޑިވިއަން’ އިން ރާއްޖެއާއި އޮސްޓްރޭލިއާއާ ދެމެދު މި އަހަރު ސީދާ ވައިގެ ދަތުރުތައް ފަށާފައިވުމަކީ ދެ ޤައުމުގެ ވިޔަފާރިއާއި ފަތުރުވެރިކަމަށް ލިބިގެންދިޔަ ވަރަށް ބޮޑު ކުރިއެރުމެކެވެ. މިއީ ތާރީޚުގައި ވެސް ދެ ޤައުމުގެ ދެމެދުގައި ސީދާ ދަތުރުތައް ފެށި ފުރަތަމަ ފަހަރެވެ.
