ކަނޑުގެ ދިރުންތަކާއި ވެށި ރައްކާތެރިކުރުމަށްޓަކައި މުޅި ދުނިޔެ ގުޅިގެން ހަރުދަނާ އަދި އަވަސް ފިޔަވަޅުތަކެއް އެޅުމަށް ބައިނަލްއަޤުވާމީ މުޖުތަމަޢަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ގޮވާލައްވައިފިއެވެ.
ދުނިޔޭގެ ކަނޑުތަކުގެ ދުވަހާ ގުޅުވައިގެން ސޯޝަލް މީޑިއާ މެދުވެރިކުރައްވައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވި ޚާއްޞަ މެސެޖެއްގައި، ރާއްޖޭގެ އިޤުތިޞާދާއި، ކާބޯތަކެތީގެ ޔަޤީންކަމުގެ އިތުރުން ތިމާވެށީގެ ދުޅަހެޔޮކަން ބިނާވެފައި ވަނީ ކަނޑުފަޅުގެ ސަލާމަތްތެރިކަމުގެ މައްޗަށްކަން ފާހަގަކުރައްވަމުން، ރައީސް ވަނީ މިހާރު ކުރިމަތިވަމުންދާ ނުރައްކާތަކަށް އަލިއަޅުއްވާލައްވާފައެވެ. އެގޮތުން ކަނޑުގެ ލޮނުގަނޑު ހޫނުވުމާއި، ފަރުތައް ހުދުވުމުގެ މައްސަލަތަކާއި، ރަށްގިރުން ފަދަ ކާރިސާތައް ކަންބޮޑުވާ މިންވަރަކަށް އިތުރުވަމުންދާތީ، މިއީ ފަސްޖެހުމެއްނެތި ބައިނަލްއަޤުވާމީ ފެންވަރުގައި ޙަރަކާތްތެރިވާންވީ ވަގުތުކަމުގައި އެމަނިކުފާނު ސިފަކުރެއްވިއެވެ.
#WorldOceanDay signals that healthy oceans are essential to life and the future of our planet. This connection is deeply personal for our people, and it directly impacts our economy, food security, and environmental sustainability.
We are advancing a forward-looking approach to… pic.twitter.com/BQcoOd2FpS
— Dr Mohamed Muizzu (@MMuizzu) June 8, 2026
ކަނޑުގެ ވަސީލަތްތައް އަންނަންއޮތް ޖީލުތަކަށް ފޯރުކޮށްދިނުމުގެ މަޤުޞަދުގައި ދިވެހި ސަރުކާރުން މިހާރު ވެސް މުހިންމު ސިޔާސަތުތަކެއް ތަންފީޒުކުރަމުންދާކަން އެމަނިކުފާނުގެ ބަޔާނުގައި ވިދާޅުވިއެވެ. މީގެ ތެރޭގައި ތިމާވެއްޓާ ރައްޓެހި ދެމެހެއްޓެނިވި މަސްވެރިކަން ކުރިއެރުވުމާއި، ކަނޑުގެ ދިރާސާތައް ފުޅާކުރުމާއި، މުރަކަ އިންދައިގެން ފަރުތައް ދިރުވުން ފަދަ މަސައްކަތްތައް ހިމެނެއެވެ.
ކޮންމެ އަހަރެއްގެ ޖޫން މަހުގެ 8ވަނަ ދުވަސް ކަނޑުތަކުގެ ދުވަހުގެ ގޮތުގައި ފާހަގަކުރާއިރު، ރައީސްގެ އެންމެ ބޮޑު އިލްތިމާސަކަށްވީ، އިންސާނިއްޔަތުގެ މާދަމާއަށްޓަކައި އެންމެން އެކަތިގަނޑަކަށްވެ މަސައްކަތްކުރުމުގެ އަޒުމް އާލާކުރުމަށެވެ.
