ބޭންކް އޮފް މޯލްޑިވްސް (ބީއެމްއެލް)ގެ “އާޔާ”އަށް މުހިންމު އަޕްޑޭޓްތަކެއް ގެނެސް، އިންޓަނެޓް އަދި މޮބައިލް ބޭންކިންގ މެދުވެރިކޮށް ޚިދުމަތްތަކަށް އެދުމުގެ ނިޒާމު އިތުރަށް ހަރުދަނާކޮށްފިއެވެ.
ޤައުމީ ބޭންކުން ހާމަކޮށްފައިވާ ގޮތުގައި، މި ގެނެވުނު ބަދަލާ އެކު އާޓިފިޝަލް އިންޓެލިޖެންސްގެ އެހީގައި މަސައްކަތްކުރާ ‘އާޔާ’ގެ ޒަރީއާއިން ކަސްޓަމަރުންގެ ސުވާލުތަކާއި ބޭނުންތަކަށް ވަގުތުން އިޖާބަދެވިގެންދާނެއެވެ. މީގެ ސަބަބުން ބޭންކުގެ ތަފާތު ޚިދުމަތްތަކަށް އެދި ހުށަހެޅުމުގެ މަރުހަލާ ކުރިއަށްވުރެ އެތައް ގުނައެއް ހަލުވިވެ، އާންމުންނަށް ބޮޑެތި ލުއިފަސޭހަތަކެއް ލިބިގެންދާނެކަމަށް ބީއެމްއެލްއިން ވަނީ ފާހަގަކޮށްފައެވެ. މީގެ އިތުރުން، ޑިޖިޓަލް އެސިސްޓެންޓް މެދުވެރިކޮށް މުއާމަލާތްކުރާއިރު، އިންސާނީ އެހީތެރިކަން ބޭނުންވާ ހާލަތްތަކުގައި ސީދާ ބޭންކުގެ ކަސްޓަމަރ ސަރވިސް މުވައްޒަފަކާ ގުޅައިލުމުގެ އިޚުތިޔާރު ވެސް ކަސްޓަމަރުންނަށް މިހާރު ލިބޭނެއެވެ.
ނަމަވެސް، މި އައު ކުރިއެރުމާ އެކު، ކުރިން މޮބައިލް އެޕްލިކޭޝަނާއި އިންޓަނެޓް ބޭންކިންގގައި ބޭނުންކުރަމުންދިޔަ އާންމު މެސެޖިންގ ފީޗަރ މިހާރު ވަނީ އުވާލާފައެވެ. ބީއެމްއެލްއިން ބުނި ގޮތުގައި މި ނިންމުމަކީ ކަސްޓަމަރުންނަށް ދެވޭ އެހީތެރިކަން އެންމެ ފުރިހަމަ ގޮތުގައި ކަށަވަރުކުރުމަށް އެޅުނު ފިޔަވަޅެކެވެ. އަދި މިއީ ކަސްޓަމަރުންނަށް އިތުބާރުހުރި ޚިދުމަތްތަކެއް ދިނުމަށް މެދުނުކެނޑި ކުރަމުންދާ މަސައްކަތުގެ މުހިންމު ބައެއްކަމަށް ވެސް އެ ބޭންކުން ވަނީ ބުނެފައެވެ.
ބީއެމްއެލްގެ ޑިޖިޓަލް ޚިދުމަތްތައް ޒަމާނީކުރުމަށް ކުރެވޭ މަސައްކަތްތަކުގެ ތެރޭގައި ހިމެނޭ ‘އާޔާ’އަކީ 2023ވަނަ އަހަރުގެ މެއި މަހުގެ 31ވަނަ ދުވަހު ތައާރަފުކުރެވުނު ޚިދުމަތެކެވެ. 24 ގަޑިއިރު މެދުކެނޑުމެއްނެތި ކަސްޓަމަރުންނަށް ޚިދުމަތް ދިނުމަށް ފަރުމާކޮށްފައިވާ މި ޑިޖިޓަލް އެސިސްޓެންޓަކީ ބޭންކުގެ ޚިދުމަތުގެ ފެންވަރު މަތިކުރުމަށް އެޅިފައިވާ ވަރަށް މުހިންމު ފިޔަވަޅެކެވެ.
