ކޯޓުގައި ހެކި ބަސްދިން ގޮތުން ބަދަލު ހިފަން ގައިގައި ޖެހުމުން ޖަލު ހުކުމެއް މީހަކަށް އަތުވެއްޖެއެވެ.
ކްރިމިނަލް ކޯޓުން މި ހަފްތާ އެ ހުކުމް އިއްވީ ގދ. ތިނަދޫ/ ގުލްބަކާގެ، އަބްދުﷲ އިސްރާގުގެ މައްޗަށެވެ. އެއީ ހެކި ބަސްދިން އަހުމަދު އުސާމް ނަމަކަށް ކިޔާ މީހެއްގެ ގައިގައި ޖަހައިގެންނެވެ.
ކޯޓުން އިއްވި ހުކުމުގެ ހުލާސާގައިވާ ގޮތުން އިސްރާގު ވަނީ އޭނާއާ އެހެން ބަޔަކާ އެކު ސައިކަލުގައި ގޮސް އުސާމު މަގުމަތިން ހުއްޓުވައި ޖަހާފައެވެ.
އެ މައްސަލައިގައި އިސްރާގު ވަނީ ކުށަށް އިއުތިރާފްވެފައެވެ. އެހެންވެ އޭނާއަށް އައީ އަސްލު އަދަބަށް ވުރެ ކުޑަ އަދަބެކެވެ. އެއީ 27 ދުވަހަށް ޖަލަށް ލުމެވެ.
ނަމަވެސް އިސްރާގު 75 ދުވަސް ޖަލުގައި ހޭދަކޮށްފައި ވާތީ އޭނާ ޖަލުގައި އިތުރު މުއްދަތެއް ހޭދަކުރާކަށް ނުޖެހޭނެއެވެ.
މީހެއްގެ ސޯޝަލް މީޑިއާ އެކައުންޓުތައް ހެކްކޮށް، ވިޔަފާރި ކުންފުންޏެއްގެ ބެންކު އެކައުންޓުން ގިނަ އަދަދެއްގެ ފައިސާ ނެގި މައްސަލައެއްގައި މިދިޔަ ޖެނުއަރީ މަހު ވެސް އިސްރާގު ހައްޔަރުކުރިއެވެ.
