ލޯކަލް ކައުންސިލް އިންތިޚާބުގެ ކާމިޔާބީ ފާހަގަކުރުމަށް ރޭ އެމްޑީޕީން ބޭއްވި ޚާއްޞަ ޖަލްސާގައި، ޕާޓީގެ ކުރީގެ ރައީސް މުޙައްމަދު ނަޝީދާއި ކުރީގެ ޗެއާޕާސަން ފައްޔާޒު އިސްމާޢީލަށް ވާހަކަދެއްކުމުގެ ފުރުސަތު ނުދިންކަމަށް ކުރެވޭ ތުހުމަތުތައް ދޮގުކުރައްވައި، އެ ބޭފުޅުންނަށް ވަގުތު ހޯދައިދޭން މަސައްކަތް ކުރިކަމަށް އެ ޕާޓީގެ މިހާރުގެ ޗެއާޕާސަން އަބްދުލްޣަފޫރު މޫސާ ބުނެފިއެވެ.
މި މައްސަލަ ހޫނުވެގެން ދިޔައީ، އެ ދެ ބޭފުޅުންނަށް ފަހު ވަގުތު ފުރުސަތު ނުދޭން ޣަފޫރު ނިންމިކަމަށް ފައްޔާޒު ތުހުމަތުކުރުމާ ގުޅިގެންނެވެ. މިކަމާ ހިތްހަމަނުޖެހުން ފާޅުކޮށް، ނަޝީދަށް ތާއީދުކުރާ ފަރާތްތަކުން ވަނީ ޖަލްސާގެ ތެރޭގައި އަޑުގަދަކޮށް އިހުތިޖާޖުކޮށްފައެވެ. އޭގެ ނަތީޖާއެއްގެ ގޮތުން، އެއްވުމުގެ ހަރަކާތްތައް މެދުކަނޑާލައި، ކަނޑައެޅިފައިވާ ވަގުތުގެ ކުރިން ޖަލްސާ ނިންމާލަން ޖެހުނެވެ.
މިކަމާ ގުޅިގެން ‘އެކްސް’ ގައި ޣަފޫރު އާންމުކުރި ޕޯސްޓެއްގައި ބުނީ، ޖަލްސާގެ އެޖެންޑާ އެކުލަވާލާފައި އޮތީ ވަކި ބޭފުޅުންތަކަކަށް އެކަނި ފުރުސަތު ދެވޭ ގޮތަށް ކަމަށެވެ. އޭގެ ތެރޭގައި ޕާޓީގެ އިސްވެރިންނާއި، މޭޔަރުންނާއި، ކެމްޕެއިން އަދި ރިފަރަންޑަމް ކޮމިޓީގެ އިސްވާރުން ހިމެނޭކަން އޭނާ ފާހަގަކުރިއެވެ. ނަމަވެސް، އެޖެންޑާ ފާސްކޮށްފައި ވަނިކޮށް ނަޝީދާއި ފައްޔާޒު ވާހަކަދައްކަން ބޭނުންވުމުން، އެކަން ހަމަޖެއްސުމުގެ މަސައްކަތް ކުރިއަށްދަނިކޮށް ހަގީގަތާ ޚިލާފު ވާހަކަތައް ފަތުރައި މަސްލަހަތު ނަގާލާފައިވާތީ އޭނާ ވަނީ ކަންބޮޑުވުން ފާޅުކޮށްފައެވެ.
ޕާޓީއަށް ލިބުނު ކާމިޔާބީގައި އެންމެހާ މެމްބަރުން ގުޅިގެން އެކުވެރިކަމާ އެކު ކުރިއަށް ދިއުމަށް ޣަފޫރު އިލްތިމާސްކުރި ނަމަވެސް، އޭނާގެ ވާހަކަތަކަށް ބައެއް ފަރާތްތަކުން ވަނީ ފާޑުކިޔާފައެވެ.
