ދުންފަތުން ރައްކާތެރި ޖީލެއް ބިނާކުރުމަށް “ޖެނެރޭޝަން ބޭން” ތައާރަފުކުރަން ކުރަމުން އަންނަ މަސައްކަތުގެ ތެރެއިން ވޯލްޑް ހެލްތު އޯގަނައިޒޭޝަން (ޑަބްލިއުއެޗްއޯ) އާއި ޔުނައިޓެޑް ނޭޝަންސް އިންޓަނޭޝަނަލް ޗިލްޑްރެންސް އެމަޖެންސީ ފަންޑް (ޔުނިސެފް) އާއެކު މަޝްވަރާކޮށްފި އެވެ.
ޒުވާން ޖީލު ދުންފަތާ ދުރުކުރުމަށް އެކަށައަޅުއްވާފައިވާ ޖެނެރޭޝަން ބޭން ކަނޑައަޅެއްވުމަށް ރައީސް ޑރ. މުހައްމަދު މުއިއްޒު އިއުލާނުކުރައްވާފައި ވަނީ ރައްޔިތުންގެ ސުވާލުތަކަށް ޖަވާބުދެއްވުމަށް ކުރިއަށް ގެންދަވާ “ރައްޔިތުންނާ އެކު” ޕޮޑްކާސްޓުގެ ފުރަތަމަ އެޕިސޯޑުގައި މިދިޔަ މަހުގެ 27 ވަނަ ދުވަހު އެވެ.
ހެލްތު މިނިސްޓްރީން ބުނީ ޖެނެރޭޝަން ބޭން ތައާރަފުކުރުމަށް ކަމާ ގުޅުންހުރި ފަރާތްތަކުގެ ހިޔާލު ހޯދުމުގެ މަސައްކަތް ސަރުކާރުން ކުރަމުންދާ ކަމަށެވެ.
އެ މަސައްކަތުގެ ތެރެއިން ހެލްތު މިނިސްޓަރު އަބްދުﷲ ނާޒިމް އިބްރާހީމް ޑަބްލިއުއެޗްއޯ އާއި ޔުނިސެފްގެ އޮފިޝަލުންނާ ބައްދަލުކުރައްވާ ކަމާ ގުޅުންހުރި މަޝްވަރާތައް ކުރައްވާފައިވާ ކަމަށް މިނިސްޓްރީން ބުންޏެވެ.
ހެލްތު މިނިސްޓްރީން ބުނި ގޮތުގައި ޖެނެރޭޝަން ބޭން ކާމިޔާބުކަމާ އެކު ތަންފީޒުކުރުމުގައި ސަމާލުކަން ދޭން ޖެހޭ ކަންކަމާ ގުޅޭގޮތުން އެ އިދާރާތަކުން ލަފާދެއްވާފައިވާ ކަމުގަ އެވެ.
ދުންފަތުން ރައްކާތެރި ޖީލެއް ބިނާކުރުމަށް ޫޖެނެރޭޝަނަލް ބޭން ތަޢާރަފުކުރުމަށް ކަމާގުޅުންހުރި ފަރާތްތަކުގެ ޚިޔާލު ހޯދުމަށް ސަރުކާރުން ކުރަމުންދާ މަޝްވަރާތަކުގެ ތެރެއިން @WHOMaldives އާއި @UNICEFMaldives ގެ އޮފިޝަލުންނާ، ޞިއްޙީ ވަޒީރު @ANazim2019 މިއަދު ވަނީ ބައްދަލު ކުރައްވާފަ. pic.twitter.com/guoc9CwIDo
— Ministry of Health (@MoHmv) April 7, 2025
ޖެނެރޭޝަން ބޭން ކަނޑައެޅުމުގައި ރައީސް ވަނީ ތިން ގޮތެއް ހުށަހަޅުއްވާފަ އެވެ. އެމަނިކުފާނު ހިއްސާކުރެއްވި ގޮތްތަކުގެ ތެރެއިން ގޮތެއް އިހުތިޔާރުކުރުމަށް އާންމުންގެ ހިޔާލަށް މިދިޔަ ބުރާސްފަތި ދުވަހު ވަނީ ހުޅުވާލާފަ އެވެ.
ސޯޝަލްމީޑިއާގައި ޕޯލްއަށް ހުށަހެޅުއްވި ތިން ގޮތަކީ:
- 2007 ވަނަ އަހަރުގެ ޖެނުއަރީ 1 އިން ފެށިގެން އުފަންވީ އަދި އުފަންވާނެ ހުރިހާ ކުދިންނަށް ދުންފަތުގެ އިސްތިއުމާލު ކުރުން މަނާކުރުން
- 2004 ވަނަ އަހަރުގެ ޖެނުއަރީ 1 އިން ފެށިގެން އުފަންވީ އަދި އުފަންވާނެ ހުރިހާ ކުދިންނަށް ދުންފަތުގެ އިސްތިއުމާލު ކުރުން މަނާކުރުން
- 2000 ވަނަ އަހަރުގެ ޖެނުއަރީ 1 އިން ފެށިގެން އުފަންވީ އަދި އުފަންވާނެ ހުރިހާ ކުދިންނަށް ދުންފަތުގެ އިސްތިއުމާލު ކުރުން މަނާކުރުން
އެގޮތަށް ހުށަހެޅުއްވުމުގެ ބޭނުމަކީ 18 އަހަރާއި 25 އަހަރާ ދެމެދުގެ އުމުރުފުރާގެ މީހުން ނުވަތަ ޒުވާނުން އެކަމުގެ ތެރޭގައި އެހާ ގިނަ ދުވަސް ނުވަނީސް، އެ ވަބާއިން ސަލާމަތް ކުރަން ފަސޭހަވާނެތީ ކަމަށް ރައީސް ވަނީ ވިދާޅުވެފަ އެވެ.
ރައީސް ވިދާޅުވެފައިވާ ގޮތުގައި އެކަމާ ގުޅޭ ކެބިނެޓް ކަރުދާހެއް، ދިރާސާ ކުރައްވައިގެން ތައްޔާރުކުރެއްވުމަށް ހެލްތު މިނިސްޓަރާ ހަވާލުކުރައްވާފައިވާ ކަމުގަ އެވެ. އެ ކަރުދާސް ތައްޔާރުކުރުމުގައި ކަމާ ގުޅޭ ފަރާތްތަކުގެ ތެރޭގައި ހިމެނިވަޑައިގަންނަވާ ޑޮކްޓަރުންނާއި އަދި އެނޫން ވެސް ފަރާތްތަކުގެ މަޝްވަރާ ހޯއްދަވަން އިރުޝާދު ދެއްވާފައިވާނެކަން ވަނީ ހާމަކުރައްވާފަ އެވެ.
ޖެނެރޭޝަން ބޭން ފިޔަވަޅުތަކަކީ ދުނިޔޭގެ އެކި ގައުމުތަކުގައި އަޅަމުންދާ ދުންފަތުގެ އިސްތިއުމާލުކުރަން އަލަށް ވަންނަ ކުދިން އެކަމުން ދުރުކުރުމަށް އަޅާ ފިޔަވަޅުތަކެކެވެ.
