މި ސަރުކާރުން ހިންގާ “އާއިލީ ބޯހިޔާވަހިކަން” ސްކީމުގެ ދަށުން ދޭ ހާއްސަ ކެޓެގަރީތަކުގެ ފްލެޓުތަކަށް ކުރިމަތިލެވޭ ޝަރުތުތައް އަނެއްކާވެސް ބަދަލުކޮށް، ވަޒީފާ އަދާކުރި މުއްދަތު ފަސް އަހަރު ދުވަހަށް އިތުރުކޮށްފިއެވެ.
ބޯހިޔާވަހިކަމުގެ މި ސްކީމުގެ ދަށުން 5ދާއިރާއެއްގެ މުވައްޒަފުންނަށް 1000ފްލެޓު ދިނުމަށް ވަނީ ކަނޑައަޅާފައެވެ. މިދިޔަ ހޯމަ ދުވަހު ގެޒެޓްކުރި ހާއްސަ ކެޓެގަރީން ފްލެޓްދޭ އުސޫލުގައި އޮތީ، ޝަރުތު ހަމަވާނީ އެ ފަސް ދާއިރާގައި މެދުނުކެނޑި ފުލްޓައިމްކޮށް 1އަހަރުވެފައިވާ މުވައްޒަފުންނަށް އެކަނި ކަމަށެވެ.
ނަމަވެސް އަނެއްކާވެސް އިސްލާހުކުރުމަށްފަހު މިއަދު ހައުސިން މިނިސްޓްރީން ޝާއިއުކުރި އާ އުސޫލުގައި ވަނީ އެ 1އަހަރު ދުވަހުގެ މުއްދަތު 5އަހަރަށް ބަދަލުކޮށްފައެވެ.
އެހެންކަމުން ފްލެޓަށް ޝަރުތު ހަމަވާނީ މެދުނުކެނޑި 5އަހަރު އެ ދާއިރާއެއްގައި މަސައްކަތް ކޮށްފައިވާ މުވައްޒަފުންނަށް އެކަންޏެވެ.
ހައުސިން މިނިސްޓަރު ޑރ. އަބްދުالله މުއްތަލިބް އިއްޔެ ވިދާޅުވީ ކުރިން 1އަހަރުގެ މުއްދަތެއް ޖަހާފައިވަނީ ސިޔާސީ މުވައްޒަފުންނަށް ވެސް ފްލެޓް ލިބުމުގެ މަގުފަހިކޮށްދިނުމަށް ކަމަށެވެ.
ނަމަވެސް މުއްތަލިބް ވިދާޅުވީ އުސޫލު އިސްލާހު ކުރީ ސިޔާސީ ގޮތުން ފްލެޓް ދިނުމަކީ ސަރުކާރުގެ ވިސްނުމެއް ނޫން ކަމަށްވާތީ ކަމަށެވެ. އެހެންނޫނަސް ކުރިންވެސް އުސޫލު އޮތީ ސިޔާސީ މުވައްޒަފުންނަށް ކުރިމަތިލުމުގެ ޝަރުތު ހަމަވާ ގޮތަށް ނޫންކަންވެސް އޭނާ ފާހަގަކުރެއްވިއެވެ.
ހާއްސަ ކެޓެގަރީގައި ހިމެނޭ ދާއިރާތައް
- ޖުޑިޝަރީ – 100ފްލެޓް
- ފުލުހުންގެ މުއައްސަސާ – 100ފްލެޓް
- އެމްއެންޑީއެފް – 100ފްލެޓް
- ސިވިލް ސާވިސް – 200ފްލެޓް
- ކެރެކްޝަނަލް ސާވިސް – 100ފްލެޓް
