ޕޭޕަލްގެ ހިދުމަތް ރާއްޖޭގައި ފަށަން މިހާރު އޮތީ ޓެސްޓިން މަރުހަލާގައިކަމަށް އިކޮނޮމިކް މިނިސްޓަރު މުހައްމަދު ސައީދު މިއަދު ވިދާޅުވެއްޖެއެވެ.
ޕޭޕަލްގެ ހިދުމަތް ރާއްޖެއަށް ގެނައުމަކީ ރައީސް ޑރ. މުހައްމަދުގެ ރިޔާސީ ވައުދެކެވެ. އަދި އުރީދޫ ފެންޓިކް ޕާޓްނަރެއްގެ ގޮތުގައި ހަމަޖައްސައި ޕޭޕަލްއާ ގުޅިގެން އެ ހިދުމަތް ތައާރަފްކުރަން ނިންމާފައިވާކަން މިދިޔަ އޮކްޓޫބަރު މަހު ސަރުކާރުން އޮތީ އިއުލާންކޮށްފައެވެ.
މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އިކޮނޮމިކް މިނިސްޓަރު ސައީދު ވިދާޅުވީ އެ ވައުދާ އެއްގޮތަށް ޕޭޕަލް ރާއްޖެއަށް ގެނެވޭނެ ކަަމަށެވެ.
އަދި ޕޭޕަލް ރާއްޖެ ގެނައުމަށް ކުރަން ޖެހޭ މަސައްކަތް ވަރަށް ބާރަށް ކުރިއަށްދާ ކަމަށް ވެސް އޭނާ ވިދާޅުވި އެވެ. އަދި ވަރަށް އަވަހަށް ޕޭޕަލް ގެނެވޭނެ ކަމަށް ވެސް އޭނާ ވިދާޅުވިއެވެ.
“‘ހިދުމަތް ސީދާ ފަށަން ޓައިމްލައިންއެއް ދޭން ދަތިވަނީ ޓެސްޓިން ފޭސްތަކެއް ކުރިއަށްދޭ” މިނިސްޓަރު ވިދާޅުވިއެވެ.
ޤަވާއިދުން ހިދުމަތްތައް އަޕްޑޭޓް ކުރަމުންދާ ޕޭޕަލް އަކީ ގިނަ ބަޔަކު ބޭނުންކުރާ އަދި އިތުބާރު ކުރެވޭ އޮންލައިން ޕޭމަންޓް ޕްލެޓްފޯމެއްގެ ގޮތުގައި ދެމިއޮތް ކުންފުންޏެކެވެ.
ރާއްޖޭން މިހާރު ޕޭޕަލް މެދުވެރިކޮށް ކުރެވޭ ކަމަކީ ފައިސާ ފޮނުވުމެވެ. އެހެންވެ އިންޓަނެޓް މެދުވެރިކޮށް ހިންގާ ވިޔަފާރީގެ އެކި މުއާމަލާތްތަކާއި އާމްދަނީ ލިބޭ މަސައްކަތްތަކަށް ފައިސާ ލިބެން މިކަން ވެފައި ވަނީ ހުރަހަކަށެވެ.
