ލޯކަލް ޓޫރިޒަމްގައި ފާހަގަކޮށްލެވޭ ބ.ފުޅަދޫގެ އާންމު ތަންތަނުގައި ނިވާކަންކުޑަކޮށް އުޅޭ ފަތުރުވެރިން ޖޫރިމަނާކުރަން އެ ރަށުގެ ކައުންސިލްއިން ނިންމައިފިއެވެ.
ފުޅަދޫ ކައުންސިލްއިން މިއަދު ކުރި އިއުލާނެއްގައި ބުނީ އެ ރަށުގެ އާންމު ތަންތަނުގައި ނިވާކަންކުޑަކޮށް އުޅޭ ފަތުރުވެރިންގެ ޝަކުވާ ލިބޭ ކަމަށާއި އެކަން ހައްލުކުރަން ކުރިން ވެސް މަސައްކަތް ކުރި ކަމަށެވެ.
އެހެންވެ އެފަދައިން އުޅޭ ފަތުރުވެރިން 750ރުފިޔާއިން ޖޫރިމަނާކުރަން ކައުންސިލްގެ ބައްދަލުވުމެއްގައި ފާސްކޮށްފައިވާ ކަމަށް ފުޅަދޫ ކައުންސިލްއިން ބުންޏެވެ.
އެ ނިންމުމަށް މިއަދުން ފެށިގެން އަމަލުކުރަން ފަށާފައިވާ ކަމަށް ވެސް ކައުންސިލްއިން ބުންޏެވެ.
ނިވާކަންކުޑަކޮށް އުޅޭ ފަތުރުވެރިންގެ މައްސަލަ މިދިޔަ އޮގަސްޓު މަހު އއ. އުކުޅަހުގެ ރައްޔިތުންނާ ބައްދަލުކުރައްވައި ރައީސް ޑރ. މުހައްމަދު މުއިއްޒުވެސް ވިދާޅުވިއެވެ.
އެގޮތުން ރަށްރަށުގައި އާންމުން ބޭނުންކުރާ ބީޗާއި، ރަސްޓޯރެންޓްތަކާއި އަދި މަގުމަތީގައި ވެސް ނިވާކަން ކުޑަކޮށް ފަތުރުވެރިން އުޅޭ ކަމުގެ ޝަކުވާ ލިބޭ ކަމަށް ރައީސް އޭރު ވިދާޅުވިއެވެ.
ބައެއް ރަށްރަށުގައި ފަތުުރުވެރިންނަށް “ބިކިނީ” ބީޗު ހާއްސަކޮށްފައި ހުއްޓަސް އާންމުން ބީޗަށް އެރޭ ސަރަހައްދަށް ބިކިނީގައި އެރޭކަން ފާހަގަކޮށްލެވެއެވެ.
