ލޯކަލް ކައުންސިލު އިދާރާތަކުގައި މަސައްކަތް ކުރާނެ އިދާރީ މުވައްޒަފުން ލިބުމުގައި ދަތިވެފައިވާ ކަމަށް ލޯކަލް ގަވާމަންޓް މިނިސްޓަރު އާދަމް ޝަރީފް ވިދާޅުވެއްޖެއެވެ.
ވ. ރަކީދޫގައި ހުންނަ ކައުންސިލްގައި މަސައްކަތް ކުރާ މުވައްޒަފުން އިސްތިއުފާ ދިނުމުން ރަށު ރައްޔިތުން ނުކުމެ ވަނީ ކައުންސިލް ބަންދުކޮށްފައެވެ.
އެކަމާ ގުޅިގެން މިނިސްޓަރ ”އެކްސް”ގައި މިއަދު ކުރެއްވި ޕޯސްޓެއްގައި ވިދާޅުވީ ފަތުރުވެރިކަމާއި އެނޫންވެސް އިގުތިސާދީ ފުރުސަތުތައް ފަހިވެފައިވާ ކުދިކުދި އާބާދީތަކުގެ ކައުންސިލު އިދާރާތަކުގައި މަސައްކަތް ކުރާނެ އިދާރީ މުވައްޒަފުން ނުލިބުމުގެ މައްސަލަ އިތުރުވަމުންދާ ކަމަށެވެ.
އެހެންވެ އެ މައްސަލަ ހައްލުކުރަން ކަމާ ބެހޭ މުއައްސަސާތަކާ ގުޅިގެން މަސައްކަތް ކުރަމުންދާ ކަމަށް މިނިސްޓަރު ވިދާޅުވިއެވެ.
ފަތުރުވެރިކަމާއި އެނޫންވެސް އިޤުތިޞާދީ ފުރުޞަތުތައް ފަހިވެފައިވާ ކުދިކުދި އާބާދީތަކުގެ ކައުންސިލް އިދާރާތަކުގައި މަސައްކަތް ކުރާނެ އިދާރީ މުވައްޒަފުން ނުލިބުމުގެ މައްސަލަ އަންނަނީ އިތުރުވަމުން.
މި މައްސަލަ ހައްލު ކުރުމަށް ގުޅުންހުރި މުއައްސަސާތަކާއެކު މިދަނީ މަސައްކަތް ކުރަމުން.…— Adam Shareef Umar (@Adamshareefz) March 2, 2026
ރައްޔިތުންނަށް ލާމަރުކަޒީކޮށް ހިދުމަތް ދިނުމަށް ކައުންސިލުތަކުގެ އިދާރާތަކުގެ ޢުމްރާނީ ހާލަތު ރަނގަޅުކުރަން މިނިސްޓްރީން ވަނީ 55ކައުންސިލް އިދާރާ އިމާރާތްކުރުމުގެ ޢަމަލީ މަސައްކަތް ފަށާފައެވެ.
ކައުންސިލުތައް އިމާރާތްކުރުމާ ގުޅޭ ގޮތުން މި އަހަރުގެ ރިޔާސީ ބަޔާން އިއްވަވަމުން ރައީސް ޑރ. މުހައްމަދު މުއިއްޒު ވިދާޅުވީ 55ކައުންސިލް އިދާރާ އިމާރާތްކުރުމުގެ މަޝްރޫއު ނިމޭއިރު، ހިދުމަތް ދިނުމަށް ބޭނުންވާ ހުރިހާ ކަމެއް ހުންނާނީ އިދާރާތަކުގައި ފުރިހަމަވެފައި ކަމަށެވެ.
މި އަހަރުގެ ތެރޭގައި އެ 55ކައުންސިލް އިދާރާގެ މަސައްކަތް ނިމި، ރައްޔިތުންނަށް ހިދުމަތް ދޭން ފެށޭނެ ކަމަށާއި ހަމައެއާއެކު، ސަރުކާރުން ހިންގާ ޕީއެސްއައިޕީގެ ދަށުން ހަ ކައުންސިލް އިދާރާއެއްގެ މަސައްކަތް މިހާރު ނިންމާފައިވާކަން ރައީސްގެ ވާހަކަފުޅުގައި ފާހަގަކުރައްވާފައިވެއެވެ.
އޭގެ އިތުރުން ޗައިނާ ސަރުކާރުގެ ހިލޭ އެހީގައި އިމާރާތްކުރާ 50ކައުންސިލް އިދާރާ ޕްރޮޖެކްޓްގެ ފީޒިބިލިޓީ ދިރާސާ ނިމިފައިވާއިރު މިހާރު ކުރިއަށް ދަނީ ކައުންސިލް އިދާރާ އަޅާނެ ބިން ހޯދުމާއި، އެނޫންވެސް އިދާރީ މަސައްކަތްތަކެވެ.
